Şuşa Rayon Təhsil Şöbəsinin nəzdində fəaliyyət göstərən metodkabinetin tədbirlər planına uyğun olaraq rayonun ayrı-ayrı ümumi təhsil məktəblərində silsilə "açıq  dərs"lər keçirilir.

Fevralın 27-də Bakının "Fatmayı bağları" adlı yaşayış massivində fəaliyyət göstərən 9 nömrəli tam orta  məktəbin Azərbaycan dili və ədəbiyyat müəllimi Naidə Şükürovanın  VII sinifdə "Zərfin morfoloji təhlili" mövzusunda "açıq dərs"i dinlənildi.

"Açıq dərs"də rayon təhsil şöbəsinin məsləhətçiləri Əyyub Əbdüləzimov, Ceyhun Məmiyev, Zülfiyyə Həsənova, məktəbin rəhbərliyi və rayonun digər ümumi təhsil məktəblərinin fənn müəllimləri iştirak edirdilər.

Qonaqlar əvvəlcə məktəbin foyesində təşkil olunmuş şagirdlərin əl işlərindən ibarət sərgiyə baxdılar. Sonra isə "açıq dərs"də iştirak etdilər. Müəllim dərs prosesində şagirdləri "Şuşa", "Mübariz" və "Qələbə" qruplarına bölməklə onların fəallığını təmin etdi, mövzuya dair əyani vəsaitlərdən istifadə etməklə fənlərarası inteqrasiya yaratdı. Dərsdə slayd və videoçarxlardan istifadə olundu. Dərs prosesində şagirdlərə müstəqil işləmək imkanı yaradan müəllim müxtəlif variantlarda test  tapşırıqları ilə onların cavablarını qiymətləndirdi.

Sonda "açıq dərs"in müzakirəsi aparıldı. Dərsin müasir tələblər səviyyəsində qurulması, interaktiv təlim üsullarından, resurslardan geniş istifadə olunması iştirakçılar tərəfindən yüksək qiymətləndirildi, bir sıra tövsiyələr verilərək müəllimin məqsədinə nail olduğu vurğulandı. 

Rəsmiyyə MƏMMƏDOVA,
Şuşa RTŞ-ın  metodkabinetinin direktoru