Ümumtəhsil məktəblərində tədrisin keyfiyyətinin
yüksəldilməsi bütövlükdə təhsilin inkişafına xidmət edir.
Fənn kurikulumlarının tətbiqi tədrisdə dönüş yaratmışdır.
Şagirdlərin aldıqları biliklər təkcə nəzəri biliklər
deyil, həm də tətbiqi biliklərlə silahlandırılır,
məntiqə əsaslanan təlimə çevrilir. Şagird təhlil edir,
tədqiqat aparır və nəticə çıxarır.
Təhsilimizin başlıca vəzifəsi ölkəmizin gələcək inkişaf
və tərəqqisini təmin edəcək yüksək intellektual
səviyyəli, elmi dünyagörüşlü, müstəqil düşünmək və
yaradıcı fəaliyyət göstərmək qabiliyyətinə malik olan
gənc nəslin yetişdirilməsindən ibarətdir. Təhsil
sistemində aparılan islahatlar müasir dərsin məzmununun
təkmilləşdirilməsi, yeni təlim texnologiyalarının
tətbiqini tələb edir.
Bu sahədə Azərbaycan Müəllimlər İnstitutunda məqsədyönlü
işlər aparılır. İnstitut müəllimlərin ixtisasartırma,
yenidənhazırlanma təhsilləri ilə yanaşı, müasir təhsilin
problemləri ilə məşğuldur. Belə ki, yeni proqramların
tətbiqi ilə bağlı təşkil edilən treninqlər, fəal və
interaktiv təlimlərin təşkili və təhlili sahəsində
müəllimlərin qazandıqları nailiyyətlər öyrənilir və
qabaqcıl təcrübələr yayılır.
Ülviyyə Eminova Bərdə rayonu N.Gəncəvi adına 2 nömrəli
tam orta məktəbin coğrafiya müəllimidir. Bərdə Rayon
Təhsil Şöbəsinin müraciətini nəzərə alıb, onun iş
təcrübəsini öyrənmək məqsədilə institutumuzun rektoru,
professor, millət vəkili A.Naxçıvanlının göstərişi ilə
Bərdə rayonundakı N.Gəncəvi adına 2 nömrəli tam orta
məktəbdə olduq.
Qeyd etməliyəm ki, rayonda müəllimlərin
təkmilləşdirilməsinə xidmət edən 14 dayaq məntəqəsi, 4
kurikulum mərkəzi yaradılmışdır. Dayaq məntəqələrində
gənc müəllimlərə köməklik məqsədi ilə seminarlar, "dəyrimi
masa"lar, müəllimlərin "açıq dərs"ləri təşkil olunur.
Müəllimlərin qabaqcıl təcrübələrinin öyrənilib yayılması
üçün "açıq dərs"lər keçirilir və yaxud müəllimlərin
diskə alınmış dərsləri nümayiş etdirilir. Son 2 ildə
Bərdə rayonunda 3 məktəb, 8 nəfər müəllim "Ən yaxşı
ümumtəhsil məktəbi" və "Ən yaxşı müəllim"
müsabiqələrinin qalibi olmuşdur.
Ülviyyə müəllimin coğrafiya kabinetində olduq. Kabinet
coğrafiya fənninin tədrisi ilə bağlı lazım olan hər cür
əyani vasitələrlə təchiz olunmuşdur. Ülviyyə müəllim hər
bir dərsini günün tələbləri səviyyəsində qurur. Təlim
prosesi zamanı kompüter, proyektor və təlimin digər
texniki vasitələrindən uğurla istifadə edir. İKT
vasitələrindən istifadədən böyük uğurlar əldə edərək
elektron dərslər hazırlayaraq təlimə marağı artırmağa
nail olur. Dərslərin yüksək səviyyədə təşkili müəllimin
pedaqoji fəaliyyəti ilə bağlıdır.
2012-ci il fevralın 27-də müəllimin IX "b" sinfində "Şərqi
Avropa ölkələri", VI "a" sinfində "Dünya okeanı və onun
hissələri", fevralın 28-də VII "a" sinfində "Şimali
Amerikanın iqlimi", VII "b" sinfində "Şimali Amerikanın
daxili suları", fevralın 29-da isə VIII sinifdə "Böyük
Qafqaz fiziki-coğrafi rayonu", IX "c" sinfində isə "Rusiya
Federasiyası" mövzularında "açıq dərs"lərini dinlədik.
Dinlədiyimiz hər bir dərsdə yeni təlim
texnologiyalarının tətbiqini, müəllimin müasir təlim
üsullarından məharətlə istifadə etməsinin şagirdlərin
böyük marağına səbəb olduğunu gördük.
Birhəftəlik dərsdinləmədən və müşahidələrdən sonra Bərdə
RTŞ-ın metodkabinetinin müdiri X.Osmanova, coğrafiya
üzrə metodist Ş.Şükürovanın və qabaqcıl coğrafiya
müəllimlərinin iştirakı ilə müəllimin dediyi "açıq
dərs"lər müzakirə olundu.
Müzakirələr zamanı belə qənaətə gəldik ki, növbəti dərs
ilində təcrübə bir daha araşdırılsın və Ülviyyə
müəllimin iş təcrübəsinin yayılması istiqamətində
tədbirlər görülsün.
Ülviyyə müəllim bütün dərslərində fəal/interaktiv təlim
metodlarından bacarıqla istifadə edir, şagirdlərin maraq
və ehtiyaclarını nəzərə alır, yaradıcı tapşırıqlar
verməklə təfəkkürün inkişaf etdirilməsinə nail olur.
Kompüterdən istifadə dərsin daha da maraqlı keçməsinə
səbəb olur. Müəllim dərsdə problemli situasiya yaradaraq,
şagirdləri düşünməyə sövq edərək, tədqiqatçılığa yönəldə
bilir. Hiss olunur ki, şagirdlərin marağından çıxış
edərək müəllim dərsi maraqlı qurur, düzgün üsul və forma
seçir, qiymətləndirmə vasitələrindən tam dolğun şəkildə
istifadə edir.
Ülviyyə müəllim hər bir dərsinə belə yaradıcı yanaşır.
Qabaqcıl müəllim kimi o, dəfələrlə fəxri fərmanlar və
təltiflərə layiq görülmüşdür. Müxtəlif seminar və
treninqlərdə iştirak etməsi barədə sertifikatları vardır.
Dövri mətbuatda çıxış edir.
Solmaya ƏMİRƏLİYEVA,
AMİ-nin "Əlavə təhsilə xidmət"
kabinetinin baş metodisti |