Bakıdakı Namiq Həmzəyev adına 238 nömrəli tam orta məktəbdə Azərbaycanın Milli Qəhrəmanı İbad Hüseynova həsr olunmuş "Vətənin azadlığı uğrunda mübarizəyə hazır ol!"  mövzusunda tədbir keçirildi. Əvvəlcə vətənimizin azadlığı, torpaqlarımızın müdafiəsi uğrunda canından keçmiş şəhidlərin xatirəsi bir dəqiqəlik sükutla yad edildi. Tədbiri giriş sözü ilə açan məktəbin direktoru İlqar Talıbov təhsil ocağında mütəmadi olaraq vətənpərvərlik istiqamətində müxtəlif tədbirlərin keçirildiyini bildirdi. Qeyd olundu ki, hər birimiz Vətənin  müdafiəsi, torpaqlarımızın bütövlüyü  uğrunda mübarizəyə hazır olmalıyıq.

"Resurs" Gənclərin İnkişafı İctimai Birliyinin sədri Samir Mehdizadə, Azərbaycanın Milli Qəhrəmanı İbad Hüseynova həsr olunmuş "Xüsusi təyinatlı" kitabının müəllifi Sahib Şirinov çıxışlarında gəncləri Vətəni sevməyə, vətənpərvər olmağa, vətən uğrunda hər bir şeyə hazır olmağa səslədilər.

Gecənin aparıcıları Milli Qəhrəman İbad Hüseynovun torpaqlarımızın azadlığı uğrunda gedən mübarizələrdə göstərdiyi igidlikdən danışdılar. Milli Qəhrəmana  həsr olunmuş "Kəşfiyyatçı"  filminə baxış keçirildi.  Tədbirin sonunda  "Xüsusi təyinatlı" kitab məktəbin kitabxanasına hədiyyə olundu.  

Rəşad ZİYADOV