Aprelin 29-da AMEA İnformasiya Texnologiyaları İnstitutunda (İTİ) Heydər Əliyev Fondu, Rabitə və İnformasiya Texnologiyaları Nazirliyi, Təhsil Nazirliyi və İTİ-nin birgə təşkilatçılığı ilə 17 may-Telekommunikasiya və İnformasiya Cəmiyyəti Gününə həsr olunan "Ali məktəb tələbələri arasında informatika üzrə Ümumrespublika Olimpiadası"nın final mərhələsi keçirildi.

Tədbiri giriş sözü ilə açan rabitə və informasiya texnologiyaları nazirinin müavini Elmir Vəlizadə bu gün Azərbaycan gənclərinin yüksək səviyyədə təhsil alması, yaradıcılıq potensialının inkişafı, öz bilik və bacarıqlarını nümayiş etdirməsi üçün lazımi şəraitin yaradıldığını bildirdi. Nazir müavini gənclərimizin İKT hazırlığının daha da təkmilləşdirilməsinin ölkədə qəbul edilən müvafiq dövlət proqramları və layihələrin başlıca hədəflərindən olduğunu söylədi, komandalara yüksək bilik yarışında müvəffəqiyyətlər arzuladı.

AMEA İnformasiya Texnologiyaları İnstitutunun direktoru, AMEA-nın müxbir üzvü, professor Rasim Əliquliyev istedadlı gənclərin bilik və bacarığının aşkarlanması, intellektual potensialının inkişafı məqsədlərinə xidmət edən olimpiadaların əhəmiyyətindən söhbət açdı. İnformatika üzrə beynəlxalq yarışlarda 1994-cü ildən iştirak edən Azərbaycanın bu müsabiqələrdə layiqincə təmsil olunması üçün görülən tədbirlər, məktəblilər arasında keçirilən olimpiadaların yüksək təfəkkürlü yeni nəsil gənclərinin seçilməsinə geniş imkanlar yaradıldığını bildirərək komanda üzvlərinə uğurlar dilədi.

Təhsil Nazirliyinin Təhsilin idarəolunmasının məlumat sistemləri şöbəsinin müdiri İsmayıl Sadıqov, BDU-nun dosenti Ramin Mahmudzadə və başqaları ölkədə keçirilən informatika üzrə ümumrespublika olimpiadasının əhəmiyyətini xüsusi vurğulayaraq iştirakçılara qələbə sevincləri arzuladılar.

Haqqında söhbət açdığımız ümumrespublika olimpiadasının ilk mərhələsi bu il aprelin 15-də Qafqaz Universitetində keçirilib. İlk mərhələdə 15 ali təhsil müəssisəsindən 45 komanda iştirak edib. Olimpiadanın ikinci final mərhələsinə respublikanın 4 ali təhsil müəssisəsindən 12 komanda vəsiqə qazanıb. Həmin gün İTİ-də keçirilən olimpiadada isə, ümumilikdə, 24 komanda iştirak edirdi. Yarış zamanı hər komandaya 5 saat ərzində 9 məsələni həll etmək tapşırığı verildi. Bildirildi ki, məsələlərin həllinin yoxlanılması və qiymətləndirilməsi digər olimpiadalardan fərqli olaraq münsiflər heyəti tərəfindən deyil, xüsusi proqram vasitəsilə həyata keçirilir. Proqramlaşdırma üzrə beynəlxalq olimpiadalarda tətbiq olunan Avtomatik Qiymətləndirmə Sistemindən istifadə olunur. Komandalar məsələlərin həllini Free Pascal, Borland C++ və Borland Pascal kimi proqramlaşdırma dillərindən birində yazırlar və proqramın mətnini yoxlamaq üçün  serverə göndərirlər. Sistem məsələlərin həllini dərhal yoxlayır və nəticənin səhv və ya düzgün olması barədə məlumatı  serverdən iştirakçının kompüterinə göndərir.

4 ali təhsil müəssisəsindən 12, regionlardan müsabiqədənkənar 9 və orta məktəb şagirdlərindən ibarət 3 komandanın iştirak etdiyi  final mərhələsində I yerin qalibi Qafqaz Universitetinin "Qafqaz proqrammers" komandası oldu. II yer Bakı Dövlət Universitetinin "Norbert", III və IV yerlər isə Qafqaz Universitetinin "Baku Qafqaz  U 3" və "Baku Qafqaz U 7" komandaları arasında bölüşdürüldü.

Olimpiadada ilk 4 yerə layiq görülən komandalar "Azərfon" və "BestComp  Group" şirkətinin təqdim etdiyi qiymətli hədiyyələrə layiq görüldülər.

Ədalət DAŞDƏMİRLİ