Rusiya İnformasiya və Mədəniyyət Mərkəzində (RİMM) azərbaycanlı şagirdlər arasında Rusiya tarixinə dair olimpiada keçirilib. Azərbaycan Respublikası Təhsil Nazirliyi, Bakı Şəhəri üzrə Təhsil İdarəsi və Rusdilli Təhsil Müəssisələri Müəllimləri Assosiasiyasının iştirakı ilə Rusiyanın Azərbaycandakı səfirliyi və "Rossotrudniçestvo"nun Bakı nümayəndəliyi tərəfindən həyata keçirilən olimpiada "Salam, Rusiya" layihəsi çərçivəsində təşkil edilib. Olimpiadada Bakının və Sumqayıtın 100-dən çox IX və XI sinif şagirdi iştirak edib. Olimpiadanın yazılı test tapşırıqlarının yerinə yetirilməsini nəzərdə tutan birinci mərhələsindən əvvəl "Araz" Ekologiya liseyi və 160 nömrəli klassik gimnaziya şagirdlərinin ifasında ədəbi-bədii kompozisiya nümayiş etdirilib.

Olimpiadanın ikinci mərhələsində "Gənc tarixçi" müsabiqəsində şagirdlər Rusiya dövlətçiliyinin yaranmasının 1150 illiyi, Rusiyanın Polşanın hərbi müdaxiləsindən azad edilməsinin 400 illiyi və Rusiyanın 1812-ci il Vətən müharibəsində qələbəsinin 200 illiyi mövzularında məruzələrlə çıxış ediblər.

Uşaqların Rusiya tarixi ilə bağlı bilikləri və onların natiqlik qabiliyyəti münsiflər heyəti tərəfindən yüksək qiymətləndirilib.

Olimpiadanın yekunlarının elan, habelə qaliblərin təltif edilməsi mərasimi bu ilin iyununda "Rusiya günü"ndə təntənəli şəkildə keçiriləcək. Olimpiada qaliblərinin "Salam, Rusiya" layihəsi çərçivəsində Rusiyaya ekskursiyaya gedəcək qrupa daxil edilməsi nəzərdə tutulub. 

Hicran ƏKBƏROVA