Bakının Nizami rayonundakı 238 nömrəli tam orta məktəbin bir qrup müəllim və şagirdi "Qardaş məktəb" layihəsi çərçivəsində Türkiyə Əmlak Bankı İlkögrətim məktəbinin dəvəti ilə 19-26  aprel  tarixlərində  Türkiyədə olub.  238 nömrəli tam orta məktəbin direktoru İlqar Talıbovdan aldığımız məlumata görə, nümayəndə heyəti  Mustafa Kamal Atatürkün məzarını ziyarət etmişdir.

Qonaqlar hər il Türkiyədə keçirilən 23 aprel - Milli Suverenlik və Uşaq Bayramında iştirak etmişdir. Tədbirdə Azərbaycanın və Türkiyənin Dövlət himnləri ifa olunmuşdur. Hər iki məktəbin şagirdləri maraqlı nömrələrlə çıxış etmişlər. Tədbirdə çıxış edənlər məktəblilərin timsalında bütün türk dünyasının uşaqlarını Milli Suverenlik və Uşaq Bayramı münasibəti ilə təbrik etmişlər.

Aprelin 24-də Türkiyənin Baş naziri Rəcəb Tayyib Ərdoğan məktəbin nümayəndə heyəti ilə görüşmüşdür. Rəcəb Tayyib Ərdoğan nitqinə ulu öndər Heydər Əliyevin "Biz bir millət, iki dövlətik"  sözləri ilə başlamışdır. O, uşaqları bayram münasibəti ilə təbrik etmişdir. V sinif şagirdi Aydan Heydərli Baş nazirə bütün azərbaycanlı uşaqlar adından "Bir ürəkdə iki can, Türkiyə - Azərbaycan" deyərək gül dəstəsi vermişdir. Baş nazir uşaqlarla şəkil çəkdirmişdir.

Sonra  azərbaycanlı qonaqlar Türkiyənin bir sıra tarixi yerlərində, muzey və qoruqlarında olmaqla qardaş xalqın adət-ənənələri  və tarixi  ilə yaxından tanış olmaq imkanı qazanmışlar. 

Rəşad ZİYADOV