Mayın 23-də Təhsil Problemləri İnstitutunda "Ümumtəhsil
məktəblərində kurikulumların tətbiqi: strategiyalar,
təcrübələr" mövzusunda seminar keçirildi. Seminarda
Təhsil Nazirliyinin nümayəndələri, məktəb direktorları,
müəllimlər, beynəlxalq məsləhətçilər və digər qonaqlar
iştirak edirdilər.
Tədbiri giriş sözü ilə TPİ-nin direktoru, professor
Abdulla Mehrabov açdı.Təhsil Nazirliyinin şöbə müdiri
Aydın Əhmədov ümumtəhsil məktəblərində kurikulumların
tətbiqi ilə bağlı görülmüş və görüləsi vacib olan
işlərdən danışdı.
Sonra TPİ-nin direktor müavini, Kurikulum Mərkəzinin
direktoru Ənvər Abbasovun "Ümumtəhsil məktəblərində
kurikulumların tətbiqi strategiyaları", Bakıdakı 258
nömrəli tam orta məktəbin təlim-tərbiyə işləri üzrə
direktor müavini Aynur Kazımovanın, Bülbül adına Orta
İxtisas Musiqi Məktəbinin ibtidai sinif müəllimi Pərvanə
Talıbovanın "İbtidai siniflərdə kurikulumların tətbiqi
təcrübəsindən", beynəlxalq məsləhətçilərin "Ümumtəhsil
məktəblərində kurikulumların tətbiqi və inkişaf
perspektivlərinin beynəlxalq tendensiyaları" və TPİ-nin
şöbə müdiri Bibixanım İbadovanın "Ümumtəhsil
məktəblərində kurikulumların tətbiqi üzrə tövsiyə və
strategiyaların işlənib hazırlanması" mövzularında
slaydlarla maraqlı təqdimatları oldu. Seminarda mövzu
ilə bağlı müzakirələr aparıldı.
Şakir CƏFƏROV |