 |
Uşaqlıq illərinə boylananda sanki iliklərimizə,
duyğularımıza bir hərarət, bir işıq seli axır...
Keçmişimizdə qayğısız uşaqlığımız qalıb,
gələcəyimizdə qayğıyla böyüdəcəyimiz uşaqlarımız
var...
Uşaqlar bütün insanlığın, bütün bəşəriyyətin
gələcəyidir. Sabahımız, davamçımız, sevincimiz
uşaqlar! Sizin qayğınızı çəkmək hamımızın
borcudur. Bu borcu ləyaqətlə yerinə yetirən
cəmiyyət öz gələcəyinə ümid bəsləyə bilər.
Məsum körpə! Dünyanın ən qədim və ən qəddar
ağrısı olan müharibə belə sənin baxışlarının
bakirəliyinə toz qondura bilməz. Müqəddəslik
olan yerdə, natəmizlik hökm sürə bilməz. Sən
baxdığın uşaqlığın üfüqlərinin o biri üzündə
nələr olub, nələr olacaq, sən hələ bilmirsən. Və
bəlkə azad Vətən elə həm də sənin baxışlarının
azadlığından, sənin gözlərindəki dərinliyin o
məsum sehrindən başlanır?!
Gözəl körpə!
Sənin yaşayacağın zaman güllə səsindən
diksinməsin... Sənin zamanının Günəşi səni
yetərincə isitsin. Yurd yerlərimiz beşiyin olsun,
yaşıl yarpaqların pıçıltısı laylan olsun.
Atalı-analı, bacılı-qardaşlı, köklü-köməcli
dünyan olsun. Dünyamız atəş səsindən yox, sənin
gülüşündən diksinsin.
Ellada UMUDLU
|
