|
Məmmədzadə Günay Vüqar qızı 2000-ci ildə Bakı şəhərində
ziyalı ailəsində anadan olub. 5 yaşından 1 nömrəli
İxtisaslaşdırılmış Olimpiya Ehtiyatları Uşaq-Gənclər
Şahmat-Dama Məktəbində şahmatla məşğul olur.
2006-2007-ci illərdə Azərbaycan çempionu və beynəlxalq
turnirlərin qalibidir. O, dəfələrlə dünya və Avropa
çempionatlarının mükafatçısıdır. Bakıdakı 6 nömrəli "İntellekt"
liseyinin VI sinif şagirdidir.
Günay
Məmmədzadə özü haqqında bunları əlavə etdi:
 -Ailəmizin
şahmata olan həvəsi və sevgisi böyükdür. Anam həmişə
istəyib ki, mən məşhur şahmatçı olum.
Yüksək idman nailiyyəti olan uşaqlarla birlikdə
çalışıram. Müəllimim yığma komandanın üzvü, beynəlxalq
qrossmeyster Rəsul İbrahimovdur. 2005-ci ildən şahmatla
məşğul oluram. İlk dəfə 2007-ci ildə Azərbaycan
çempionatında səkkizyaşlı qızlar arasında keçirilən
yarışda III, IV yeri, 2007-ci ildə isə Gürcüstanın
Batumi şəhərində keçirilən səkkizyaşlı qızlar arasında
Avropa çempionatında III yerə çıxmışam. Həmin ili
Türkiyənin Antalya şəhərində keçirilən dünya
çempionatında II yeri tutmuşam. 2008-ci ildə Batumidə
keçirilən dünya çempionatında I yerə çıxaraq üçrəngli
bayrağımızı zirvəyə qaldırmışam. Həmin ildə Vyetnamın
Vunqtau şəhərində səkkizyaşlı qızlar arasında keçirilən
dünya çempionatında III, 2009-cu ildə isə 10 yaşlı
qızlar arasında Türkiyənin Antalya şəhərində keçirilən
dünya çempionatında I yerə çıxmışam. 2009 -cu ildə
Gənclər və İdman Nazirliyi tərəfindən keçirilən
"Yaxşıların yaxşısı" nominasiyasının qalibi, 2007,
2008, 2009-cu illərdə Təhsil Nazirliyinin keçirdiyi "İlin
ən yaxşı şahmatçısı" nominasiyasında birinci yeri
tutmuşam. 2011-ci ildə qadınların Bakı çempionatında II
yerin sahibi, sonralar dəfələrlə Avropa çempionu və
beynəlxalq turnirlərin qalibi olmuşam. Nəhayət, 2012-ci
ildə Rumıniyanın Yası (İassi) şəhərində 36 ölkənin
iştirakı ilə keçirilən məktəblilər arasında şahmat üzrə
VIII dünya çempionatında I yerə çıxaraq dünya çempionu
adını almışam.
Rəsul
İbrahimov -Yığma komandanın üzvü, beynəlxalq
qrossmeyster:
 -
Günayın digər idmançılardan fərqi daha çox elmli və
həmişə şahmata olan həvəsinin çox olmasıdır. Onun oyun
səviyyəsi, ağıllı şəkildə düşünərək addım atmağı başqa
idmançılara nisbətən daha çoxdur. O, digərlərindən öz
istedadı ilə də fərqlənir. İdmançının gələcək uğurları
da onun öz üzərində müntəzəm çalışması və məqsədinə
çatmaq üçün mübarizə aparmasından asılıdır. İdmançı əgər
məşqlərə gün ərzində 3 saat vaxt ayırırdısa, kifayət
qədər uğur qazandıqdan sonra 6 saat vaxt ayırmalıdır. Bu
şəkildə davam etməsə, gələcəkdə onun üçün irəli getmək
çox çətin olacaq. Amma mən ümid edirəm ki, Günaya
qazandığı uğurlar stimul verəcək ki, gələcəkdə də o,
yüksək yaş qruplarında çempion olub ölkəmizə medallar
gətirib bizi sevindirəcək və dünyada qadınlar arasında
tanınmış şahmatçı olacaq. Hər bir müəllim kimi mən də
yetirməmin uğurlarını öz uğurum kimi qiymətləndirirəm.
Natiq
Ələkbərov - 1 nömrəli İxtisaslaşdırılmış Olimpiya
Ehtiyatları Uşaq-Gənclər Şahmat-Dama Məktəbinin
direktoru:
- Günayın əldə etdiyi uğurlarına hamıdan çox mən
sevinirəm. Onun bütün yarışlarında iştirak etmiş rəhbər
müəllim kimi onu deyə bilərəm ki, Günay Məmmədzadə çox
təcrübəli və güclü şahmatçıdır. O, öz yolu, öz oyun
tərzi ilə digər idmançılardan fərqlənir. Arzumuz Günayı
qadınlar arasında dünya və olimpiya çempionu
görməkdir.
Gülşən
Orucova - Bakıdakı 6 nömrəli "İntellekt" məktəb-liseyin
direktoru:
-Sağlam bədəndə sağlam ruh olur. Bu, həqiqətən belədir.
Qeyd etmək istərdim ki, 6 nömrəli məktəb tarix boyu öz
idmançıları ilə də tanınıb. Təhsil ocağının məzunları
arasında həmişə ölkəmizi beynəlxalq turnirlərdə layiqli
təmsil edən idmançılar olub. Belə idmançılardan biri də
Günay Məmmədzadədir. Günay və qardaşı bizim məktəbin
şagirdidir. Hər bir şagirdin istənilən sahədəki uğuru
məktəbdən və valideyndən asılıdır. Günayın valideynləri
övladlarını müasir dövrün tələblərinə uyğun şəkildə
tərbiyə edir, yetişdirirlər. Günay şahmatla bərabər
dərslərini də müvəffəqiyyətlə yerinə yetirir. O, bizim
məktəbin fəxridir. Həqiqətən də çox tərbiyəli,
bacarıqlı, məktəbin adını ucaldan bir şagirddir.
Arzum və istəyim odur ki, Günayın uğurları bundan sonra
daha da artsın və o, şahmat tacını odlar yurdu
Azərbaycana gətirsin.
Rəşad ZİYADOV |
