Bakı Pedaqoji Kadrların İxtisasartırma və Yenidənhazırlanma İnstitutunun rektoru, fizika-riyaziyyat elmləri doktoru, professor Asəf Zamanov kompozit materiallar mexanikası üzrə XVII Beynəlxalq elmi konfransın Təşkilat Komitəsinin sədri, "Mechanics of Composite Materials" dövri elmi jurnalının baş redaktoru,  Avropa Elmlər Akademiyasının və Latviya Elmlər Akademiyasının akademiki  Vitauts Tamujun dəvəti əsasında adıçəkilən beynəlxalq konfransda iştirak etmişdir. Kompozit materiallar mexanikasının aktual problemlərinə həsr edilmiş dünyanın 31 ölkəsindən 200-ə qədər alimin iştirak etdiyi konfransın 7 bölməsindən birinə  - "Kompozit strukturlar" bölməsinə rəhbərlik professor Asəf Zamanova həvalə olunmuşdu. Qeyd etmək yerinə düşər ki, konfransın Təşkilat Komitəsinin dünyanın müxtəlif ölkələrindən olan 17 üzvündən biri də Asəf Zamanovdur. Konfransın əsas təşkilatçılarından biri impakt faktor göstəricili, Latviyada rus dilində, Nyu-Yorkda ingilis dilində nəşr edilən, Azərbaycandan da professor A.Zamanovun redaksiya heyətində təmsil olunduğu "Mechanics of Composite Materials" beynəlxalq elmi jurnalıdır. Beynəlxalq konfransda Asəf müəllim elmi rəhbərlik etdiyi doktorantlarla birgə son vaxtlar alınmış elmi nəticələr əsasında 2 məruzə ilə çıxış etmişdir. Hər iki məruzə konfransda iştirak edən mütəxəssislər tərəfindən yüksək qiymətləndirilmişdir.

Xarici ölkə universitetləri ilə  BPKİYİ-nin elm və təhsil sahəsində gələcək əməkdaşlığına dair məsələlər də konfransda iştirak edən həmin universitetlərin səlahiyyətli şəxsləri ilə birgə müzakirə edilmişdir. Finlandiyanın Helsinki Universiteti ilə də əməkdaşlığın təməli qoyulmuş, beynəlxalq əlaqələr sahəsində institutun fəaliyyəti daha da genişlənmişdir. 

Sevinc QULİYEVA,
BPKİYİ-nin Beynəlxalq əlaqələr şöbəsinin müdiri