İyunun 1-də Bakıdakı 20 nömrəli məktəb-liseydə
Azərbaycan Respublikasının dövlət müstəqilliyinin
bərpasının iyirminci ildönümünə və 28 may- Respublika
Gününə həsr olunmuş ümumtəhsil məktəblərinin şagirdləri
arasında keçirilmiş ifa üzrə respublika müsabiqələri
qaliblərinin yekun konserti və mükafatlandırılması
mərasimi oldu.
Tədbiri Təhsil Nazirliyinin Tərbiyə və məktəbdənkənar
müəssisələr şöbəsinin müdiri Ağababa İbrahimov açaraq
təhsil naziri cənab Misir Mərdanovun salamlarını mərasim
iştirakçılarına çatdırdı. Nazirlik tərəfindən ilk dəfə
olaraq keçirilən ümumtəhsil məktəblərinin şagirdləri
arasında ifa müsabiqələri haqqında məlumat verən
A.İbrahimov bildirdi ki, bu müsabiqələr müvafiq olaraq
Təhsil Nazirliyinin 24 oktyabr 2011-ci il və 18 aprel
2012-ci il tarixli əmrlərinə əsasən ümumtəhsil
məktəblərinin şagirdləri arasında keçirilib.
Müsabiqələrin keçirilməsində məqsəd ümumtəhsil
məktəbləri şagirdlərinin ifa mədəniyyətini yüksəltmək,
musiqi alətlərində Azərbaycan bəstəkarlarının
əsərlərinin, xalq mahnılarının səsləndirilməsi
istiqamətində aparılan işlərin səmərəliliyini artırmaq,
xüsusu istedada malik uşaq və gəncləri üzə çıxarmaqdan
ibarətdir. Müsabiqələr 4 mərhələdə keçirilib, yüzlərlə
iştirakçı arasında ən yaxşıları qalib olaraq
müəyyənləşdirilib.
Sonra müxtəlif nominasiyalar üzrə qalib olmuş istedadlı
uşaqların ifasında mahnılar, şeirlər dinlənildi. Hər ifa,
hər çıxış iştirakçılar tərəfindən maraqla qarşılandı.
Tədbirin sonunda müsabiqələrin respublika mərhələsində
mahnı, çalğı alətlərində ifa və şeir nominasiyaları üzrə
I, II, III yerləri tutan və fəal iştirak edən 15 şagird
Təhsil Nazirliyinin diplom və hədiyyələri ilə
mükafatlandırıldılar.
Ədalət DAŞDƏMİRLİ |