Javascript DHTML Drop Down Menu Powered by dhtml-menu-builder.com

Ana səhifə Seçilmişlərə əlavə et Bizə yazın

 

ARXİV

15 İyun 2012 - №23

 

Təhsilin keyfiyyəti innovasiyaların düzgün tətbiqindən başlayır

 

Bu barədə Bakı Pedaqoji Kadrların İxtisasartırma və Yenidənhazırlanma İnstitutunda 7-9 iyun 2012-ci il tarixlərdə keçirilmiş II Beynəlxalq elmi konfransda müzakirələr aparıldı

Konfrans başlamazdan əvvəl iştirakçılar və qonaqlar Fəxri xiyabanda Azərbaycan xalqının ümummilli lideri Heydər Əliyevin abidəsi önünə əklil qoydular. Akademik Zərifə xanım Əliyevanın da abidəsi ziyarət edildi. Şəhidlər xiyabanında isə vətənimizin azadlığı uğrunda həlak olanların məzarları ziyarət olundu. Bakı Pedaqoji Kadrların İxtisasartırma və Yenidənhazırlanma İnstitutunda yeni yaradılmış Heydər Əliyev muzey-lektoriyası, həmçinin institutun fəaliyyətilə tanışlıqdan sonra öz işinə başlayan "İnnovasiya, təhsilin keyfiyyəti və inkişaf" mövzusunda II Beynəlxalq elmi konfransı giriş sözü ilə institutun rektoru, fizika-riyaziyyat elmləri doktoru, professor Asəf Zamanov açaraq konfrans iştirakçılarını, respublikamızda fəaliyyət göstərən diplomatik missiyaların nümayəndələrini, elm və təhsil sahəsində tanınmış mütəxəssisləri və digər dəvətliləri salamladı. Azərbaycan Respublikası Təhsil Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi, Bakı Pedaqoji Kadrların İxtisasartırma və Yenidənhazırlanma İnstitutu, Ukrayna Təhsil Menecmenti Universiteti, Rusiya Federasiyasının İvanovsk Vilayət Təhsilin İnkişafı İnstitutu, Böyük Britaniyanın Esseks Universiteti, Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Müəllimlər İnstitutu, Kiyev Vilayət Pedaqoji Kadrların Diplomdansonrakı Təhsil İnstitutu, Minsk Vilayət Təhsilin İnkişafı İnstitutu, Belarus Diplomdansonrakı Təhsil Akademiyası və digər ali məktəblərin təmsil olunduğu Təşkilat Komitəsinə göstərdikləri fəaliyyətlərinə görə təşəkkür etdi. O, qeyd etdi ki, "İnnovasiya, təhsilin keyfiyyəti və inkişaf" mövzusunda I elmi konfrans 2010-cu ilin noyabr ayında Bakı Pedaqoji Kadrların İxtisasartırma və Yenidənhazırlanma İnstitutunda keçirilmişdir. Asəf müəllim keçirilməsi artıq ənənəyə çevrilmiş bu konfransların əhəmiyyətindən söz açdı. Bildirdi ki, ixtisasartırma təhsilinin problemlərinə həsr edilmiş elmi konfranslar həm də əməkdaşlıq etdiyimiz Rusiya, Belarus və Ukrayna respublikalarında mütəmadi olaraq keçirilir. Biz institut olaraq həmin konfranslarda da əsas təşkilatçı kimi fəal iştirak edirik. Əldə edilən təcrübə bir daha təsdiqləyir ki, Avropa təhsil sisteminə inteqrasiya yolunda qarşılıqlı əməkdaşlıq, təcrübə mübadiləsi və onların tədris prosesində tətbiqi uğurlu nəticələr verir. İnformasiya cəmiyyəti şəraitində  qarşımıza yeni problemlər çıxır ki, onları da ancaq birgə geniş əməkdaşlıq çərçivəsində həll etmək mümkündür. Elə bugünkü konfransın məram və məqsədi də bundan ibarətdir. Məlumdur ki, hər bir dövlətin inkişafı təhsilin keyfiyyətindən asılıdır. Lakin bir reallığı da nəzərdən qaçırmaq olmaz ki, təhsilin keyfiyyətinə dövlətin iqtisadi inkişafının səviyyəsi də həlledici təsir göstərir. Bütün bunları müstəqil  Azərbaycan Respublikasının timsalında görə bilərik. Memarı ümummilli liderimiz Heydər Əliyev olan Azərbaycan Respublikası bütün çətinliklərə, xüsusilə Ermənistan-Azərbaycan münaqişəsinə baxmayaraq, son illərdə sürətlə inkişaf edir və inkişaf tempinə görə dünyada lider dövlətlərdən biridir. Bunu təkcə biz deyil, aparıcı beynəlxalq təşkilatlar da təsdiqləyir. Məhz bu yüksəlişin nəticəsində son illərdə təhsilimiz keyfiyyətcə yeni inkişaf mərhələsinə qədəm qoymuşdur. Təhsilin maddi-texniki bazası da sürətlə inkişaf edir. Belə ki, son səkkiz ildə 2200-ə qədər orta məktəb binası yenidən tikilib, əsaslı təmir edilmiş, kompüterləşdirilmiş, demək olar ki, bütün ali məktəblərin, həmçinin orta ixtisas məktəblərinin maddi-texniki bazası gücləndirilmişdir. Konfrans iştirakçıları və qonaqlar Bakıdakı 132-134 nömrəli Təhsil Kompleksində və 160 nömrəli Klassik Gimnaziyada olarkən bizdə fəxarət doğuran bu uğurların bir daha şahidi oldular. Bütün bu proqramların icrası isə birbaşa ölkədə mövcud olan kadr potensialından asılıdır. Ölkəmizdə intellektual potensialın inkişafı istiqamətində Azərbaycan Respublikasının Prezidenti İlham Əliyev cənabları çoxsaylı sərəncamlar imzalamışdır. Təsdiq edilmiş Dövlət Proqramına əsasən, 2007-2015-ci illərdə 5000 azərbaycanlı gənc dünyanın aparıcı ali təhsil ocaqlarında ölkəmizə gərəkli ixtisaslar üzrə təhsil alaraq yüksək ixtisaslı kadr kimi fəaliyyətlərini davam etdirəcəklər. Bu da qara qızıl kapitalını insan kapitalına çevirmək istiqamətində atılan mühüm addımlardandır.

Azərbaycanın Birləşmiş Millətlər Təşkilatının Təhlükəsizlik Şurasının on qeyri-daimi üzvündən biri seçilməsi, böyük 20-liklərin iclasına dəvət almış 10 ölkədən biri olması, həmçinin "Eurovision-2012" mahnı müsabiqəsinə yüksək səviyyədə ev sahibliyi etməsi və beləliklə də beynəlxalq aləmdə ölkəmizin gündən-günə artan nüfuzu bütün sahələrdə olduğu kimi, elmin və təhsilin inkişafına da öz müsbət təsirini göstərir. Bakı Pedaqoji Kadrların İxtisasartırma və Yenidənhazırlanma İnstitutunda da təhsilin inkişafı istiqamətində innovasiyalar tətbiq olunur. Əldə etdiyimiz uğurlar ölkənin pedaqoji ictimaiyyəti, həmçinin Təhsil Nazirliyi tərəfindən yüksək qiymətləndirilir ki, bu da bizə fəaliyyətimizə mənəvi stimul verir. Son dörd ildə institutun professor-müəllim heyəti tərəfindən ölkəmizdə və xaricdə nəşr edilən elmi jurnallarda 600-dən çox elmi əsərin çap etdirilməsi (institut yarandığı  1939-cu ildən 2007-ci ilə qədər cəmi 110 elmi əsər çap edilmişdir), xarici ölkələrin  30-a qədər ali məktəbi ilə əməkdaşlığın həyata keçirilməsi, 7 beynəlxalq elmi konfransın əsas təşkilatçılarından olması ölkəmizin Prezidenti möhtərəm İlham Əliyev cənabları tərəfindən uğurla aparılan xarici və daxili siyasət nəticəsində mümkün olmuşdur. Bu əməkdaşlıq nəticəsində həyata keçirilən II Beynəlxalq elmi konfrans da inanırıq ki, uğurla öz işini başa çatdıracaqdır. Bu işdə bütün iştirakçılara müvəffəqiyyətlər arzulayıram.

Sonra Azərbaycan Respublikası təhsil nazirinin müavini Qulu Novruzov çıxış edərək iştirakçılara təhsil naziri, professor Misir Mərdanovun salamlarını çatdırdı və qeyd etdi ki, innovativ metodların tətbiqi təhsilin bütün pillələrinə müsbət təsir göstərir. Öz işinə başlayan II Beynəlxalq konfrans müzakirə olunan və qəbul edilən qərarlarla bu istiqamətdə beynəlxalq əməkdaşlığın daha da genişləndirilməsinə öz töhfəsini verəcəkdir.

Plenar iclasda Belarusun Azərbaycandakı səfiri Nikolay Patskeviç, Ukraynanın Azərbaycandakı səfirliyinin I katibi Anatoliy Maykovskiy, Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov, Azərbaycan Respublikası Təhsil Şurasının sədri, professor Əjdər Ağayev, Minsk Vilayət Təhsilin İnkişafı İnstitutunun prorektoru Marina Krasnova, Binəqədi Rayon İcra Hakimiyyəti başçısının müavini Vüsal İsmayılov, Təhsil Problemləri İnstitutunun direktoru, professor Abdulla Mehrabov və başqaları iştirakçılara təbriklərini çatdırıb, uğurlar arzuladılar.

Təbrik çıxışlarından sonra professor Asəf Zamanov "İnnovasiyalar keyfiyyətin yüksəlməsinə xidmət etməlidir", Ukrayna Təhsil Menecmenti  Universitetinin rektoru, professor Viktor Oleynik "Ukrayna diplomdansonrakı pedaqoji təhsilinin modernləşdirilməsi: mahiyyəti və həyata keçirilmə şəraiti", Kiyev Vilayət Pedaqoji Kadrların Diplomdansonrakı Təhsil İnstitutunun rektoru, professor Nataliya Klokar "Avropaya inteqrasiya şəraitində pedaqoji kadrların peşə səriştəliliyinin formalaşdırılması" və Ukrayna Pedaqoji Elmlər Akademiyası İnformasiya Texnologiyaları İnstitutunun direktoru, professor Valeriy Bıkov "İnformasiya cəmiyyəti çağırışı və təhsilin informasiyalaşdırılmasının müasir istiqamətləri" mövzularında məruzələr etdilər. Plenar iclas məruzələrin müzakirəsi ilə başa çatdı. Sonra konfrans işini 5 bölmədə - innovasiyalar və ənənələr: təhsilin keyfiyyəti; təhsilin idarə edilməsi: reallıqlar və perspektivlər; təhsilin keyfiyyətinin qiymətləndirilməsinin metodologiyası və texnologiyası; təhsilin keyfiyyətinin modernləşdirilməsinin psixoloji və sosial-iqtisadi aspektləri; müasir tədrisin problemləri - bölmələrində iki gün davam etdirdi. İyunun 9-da keçirilən yekun iclasda bölmə rəhbərlərinin hesabatı dinlənildi və müvafiq qərar qəbul edildi. Qərara əsasən "İnnovasiya, təhsilin keyfiyyəti və inkişaf" mövzusunda III Beynəlxalq elmi konfransın 2014-cü ilin aprel ayında Bakı Pedaqoji Kadrların İxtisasartırma və Yenidənhazırlanma İnstitutunda keçirilməsi müəyyənləşdirildi.

Konfransın işinə yekun vuran həmsədrlər - professor Asəf Zamanov və professor Viktor Oleynik çıxış edərək görülən işlərin nəticələri haqqında məlumat verdilər. Onlar konfransın işində göstərdikləri yüksək fəallığa görə iştirakçılara və təşkilatçılara minnətdarlıqlarını bildirdilər, gələcək fəaliyyətlərində uğurlar arzuladılar.    

Sonda konfrans iştirakçılarına sertifikatlar təqdim edildi. 

Ədalət DAŞDƏMİRLİ

 
 
 
Səhifənin başına qalx "Xəbərlər" bölməsinə get Nömrənin müdəricatına dön

Səhifənin başına qalx

 
 

 
 
 
 
 
 
 

 
 

İnternet və ya sayt daxilində  axtarmaq istədiyiniz sözü xanaya yazıb "Axtar" düyməsini sıxın

internetdə

saytda

 
 

AZƏRBAYCAN
RESPUBLİKASI
TƏHSİL
QANUNU

ƏN YAXŞI
MÜƏLLİMLƏR

ƏN YAXŞI
MƏKTƏBLƏR

700 BAL
TOPLAYANLAR

 
Heydər Əliyev
İlham Əliyev
Heydər Əliyev Fondu

Təhsil Nazirliyi

 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

ELANLAR

       
 

Copyright  ©  All Rights Reserved.
Created and supported by Mehman Shafagatov