Türkiyə
Cümhuriyyətinin Ərzincan Universitetinin rektoru,
professor İlyas Çapoğlu və onun başçılıq etdiyi heyət
Naxçıvan Dövlət Universitetində iki günlük səfərdə
olmuşdur. Qonaqlar universitetdəki tədris prosesi ilə
yaxından tanış olmuş, Azərbaycan xalqının ümummilli
lideri Heydər Əliyevin həyat və fəaliyyətini, siyasi
irsini təbliğ edib araşdıran Heydər Əliyev
Universitetində maarifləndirici universitet televiziyası,
Mətbuat şöbəsi və "Nuhçıxan" radiosunun cəmləşdiyi Media
Mərkəzində olmuşlar. Universitetin Tələbə Teatr
Studiyasının türk dünyasının böyük ədibi Nazim Hikmətin
110 illik yubileyi münasibətilə hazırladığı "Qəribə adam"
tamaşası maraq və rəğbətlə qarşılanmışdır.
Rektorluqda keçirilən görüşdə eyni tarixi köklərə
malik Azərbaycan və Türkiyə arasındakı birlik və
dostluqdan, hər iki ölkə rəhbərliyinin "Bir millət, iki
dövlət!" siyasətini uğurla davam etdirməsindən
danışılmışdır. Rektor, akademik İsa Həbibbəyli
universitetin strukturu, professor-müəllim heyəti,
tələbə kontingenti ilə bağlı məlumat vermiş, bu arada
türkiyəli tələbələr də daxil olmaqla 229 xarici
vətəndaşın təhsil aldığını bildirmişdir. Rektor qeyd
etmişdir ki, 70-ə yaxın ölkə ilə beynəlxalq əlaqəyə
malik Naxçıvan Dövlət Universiteti qardaş Türkiyənin
Ankara, Ərdahan, Van 100-cü il, Kocaeli universitetləri
ilə dayanıqlı elmi əməkdaşlığa malikdir.
Xatırladılmışdır ki, Qars Qafqaz Universitetinin
təşəbbüsü ilə Bakı-Tbilisi-Ərdahan-Qars dəmiryolu
üzərində yerləşən ali məktəblərin əməkdaşlığı layihəsi
uğurla həyata keçirilir. Bu yaxınlarda Türkiyə
Cümhuriyyətinin Ağrı İbrahim Çeçen Universitetində "Bölgə
universitetləri arasındakı işbirliyinin genişlənməsi və
qarşıdakı hədəflər" mövzusunda keçirilən seminarda
Naxçıvan Dövlət Universitetinin Türkiyə Cümhuriyyətinin
Ərzurum Atatürk, Qars Qafqaz, Ağrı İbrahim Çeçen, İqdır,
Ərdahan və Gürcüstan universitetləri ilə Mövlana
proqramı üzrə tələbə mübadiləsinə dair danışıqlar
aparılmışdır.
Ərzincan Universitetinin rektoru, professor İlyas
Çapoğlu təmsil etdiyi universitetin 1976-cı ildə
Ərzincan Məslək Yüksəkokulu kimi fəaliyyətə başladığını,
2006-cı ildən müstəqil universitet olan bu ali məktəbi
Anadoluda dünya universiteti kimi formalaşıb inkişaf
etməkdə olduğunu söyləmişdir. Rektor buradakı fakültələr,
elmin, təhsilin səviyyəsi haqqında danışmışdır.
Səfərin ikinci günü keçirilən görüşdə hər iki
universitetin rektoru ikitərəfli iş birliyinin elm və
təhsilin inkişafı, dünya təhsil sisteminə inteqrasiya
baxımından əhəmiyyətindən danışmışlar. Sonra qarşılıqlı
əməkdaşlıq haqqında anlaşma memorandumu imzalanmışdır.
Sənəddə universitet tələbələri və mühazirəçiləri
arasında təhsil, professionallıq və mədəni fəaliyyəti
dəstəkləmək və akademik əməkdaşlığı, qarşılıqlı mədəni
əlaqələrin artırılması məsələləri öz əksini tapmışdır.
Anlaşma memorandumunda fakültə əməkdaşları və tələbə
mübadiləsi, mütəxəssis və ekspertlərin səfəri, elmi
tədqiqat işləri və informasiya mübadiləsi, müştərək
konfrans və simpoziumların, onlayn əlaqələrin təşkili
nəzərdə tutulur.
Türkiyəli qonaqlar universitetin təsviri incəsənət və
rəsmxət ixtisası tələbələrinin əl işlərindən ibarət
sərgiyə baxmış, universitetin incəsənət fakültəsinin
konsert proqramını maraqla izləmişlər.
Mehriban SULTAN |