ADPU-nun Azərbaycan və dünya ədəbiyyatı tarixi kafedrasının müdiri, professor Himalay Ənvəroğlunun (Qasımov) "Sənət və  sənətkarlıq məsələləri yeni düşüncə müstəvisində" adlı kitabı (elmi redaktor və ön sözün müəllifi:  əməkdar elm xadimi, filologiya elmləri doktoru, professor Nərgiz Arif qızı Paşayeva, rəyçilər:   filologiya elmləri doktoru, professorlar Elman Hilal oğlu Quliyev  və Təyyar Salam oğlu Cavadov) Bakı, "Elm və təhsil" nəşriyyatında çapdan çıxmışdır.

Kitabda dramaturgiyamızın təkamülündə mühüm rol oynayan H.Cavid, S.Vurğun, İ.Əfəndiyev və Anar yaradıcılığının özünəməxsusluğu, əsərlərinin ideya-estetik xüsusiyyətləri sistemli şəkildə təhlil olunur. Onların Azərbaycan dramaturgiyasının inkişafına verdikləri töhfələrə  elmi-nəzəri düşüncə  müstəvisində aydınlıq gətirilir. Kitabda  yer alan məqalələrdə isə  ustad  sənətkarların yaradıcılığının bəzi məqamları  yeni baxış bucağı əsasında incələnir və bir sıra ədəbi-tənqidi əsərlər barədə  konseptual  mülahizələr yürüdülür.

"Sənət və sənətkarlıq məsələləri yeni düşüncə  müstəvisində" adlı kitabda çözülənlər oxucuda  tədqiqatçının özünəməxsus təfəkkür tərzi barədə dolğun fikir formalaşdırır.

İnanırıq ki, istedadlı ədəbiyyatşünas-alim Himalay Ənvəroğlunun digər əsərləri kimi bu kitabı da elmi ictimaiyyət tərəfindən böyük rəğbətlə  qarşılanacaq. 

Şakir CƏFƏROV