Xəbər verdiyimz kimi, 30 may - 14 iyun 2012-ci il tarixlərində Türkiyədə X Beynəlxalq Türk Dili Olimpiadası keçirilib.135 ölkədən 1500 məktəblinin qatıldığı bu möhtəşəm yarışda Azərbaycanı təmsil edən 65 məktəblimiz növbəti uğura imza ataraq 26 medal qazanıb.

İyunun 26-da Bakı Özəl Türk Liseyində X Beynəlxalq Türk Dili Olimpiadasının yekunlarına və Azərbaycan məktəblilərinin bu nüfuzlu yarışda qazandıqları nailiyyətlərə həsr olunan mətbuat konfransı keçirildi. Tədbirdə Yeni Azərbaycan Partiyasının Səbail Rayon Təşkilatının sədri Zahid Qaralov, Milli Televiziya və Radio Şurasının sədri Nuşirəvan Məhərrəmli, Milli Məclisin deputatları, Türkiyədə keçirilən olimpiadada uğurla iştirak edən Azərbaycan komandasının üzvləri, müxtəlif nominasiyalar üzrə qalib gələn şagirdlər, onların valideynləri, KİV nümayəndələri və başqaları iştirak edirdilər.

Konfransı Azərbaycan-Türkiyə Özəl Liseyləri Baş İdarəsinin rəisi, Türkcə Olimpiadası Respublika Təşkilat Komitəsinin sədri Mesut Kurnaz açaraq 2003-cü ildə 17 ölkədən 62 məktəblinin iştirakı ilə keçirilən ilk Beynəlxalq Türk Dili Olimpiadasına ildən-ilə marağın artdığını söylədi. Qeyd olundu ki, "İnsanlıq əl-ələ" devizi altında keçirilən  X Beynəlxalq Türk Dili Olimpiadasında şagirdlər yazı, danışıq, qrammatika, xalq rəqsləri, şeir, rəsm, tamaşa, mahnı, tanıtım stendləri daxil olmaqla 14 nominasiya üzrə çıxış ediblər. Olimpiadanın  final mərhələsi 30 may - 14 iyun 2012-ci il  tarixlərində Türkiyənin 45 şəhərində 67 proqram üzrə təşkil olunmuşdu. 100 min tamaşaçının qatıldığı və özünün möhtəşəmliyi, məktəblilərin çıxışlarının rəngarəngliyi ilə yadda qalan olimpiadanın rəsmi bağlanış mərasimi isə İstanbulun Türk Telekom stadionunda təşkil edildi. X Beynəlxalq Türk Dili Olimpiadasında Azərbaycan da böyük bir nümayəndə heyəti ilə təmsil olunurdu.

Azərbaycan-Türkiyə Özəl Liseyləri Baş İdarəsinin rəisi Mesut Kurnaz daha sonra çıxışında Türkiyə mətbuatında olimpiada ilə əlaqədar 2521 xəbərin  yayımlandığını və Türkiyənin 45 televiziya kanalının müxtəlif proqramlarında yarışmanın gedişatının işıqlandırıldığını dedi. Türkiyə Respublikasının Prezidenti Abdullah Gül tərəfindən olimpiada iştirakçılarının Prezident İqamətgahında qəbul olunduğunu, həmçinin nüfuzlu yarışmanın yekun tədbirində Türkiyə Respublikasının Baş naziri Rəcəb Tayyib Ərdoğanın da iştirak etdiyini deyən M.Kurnaz bunların məktəblilərin həyatında əlamətdar və unudulmaz hadisə olduğunu xüsusi vurğuladı.

İdarə rəisi olimpiada çərçivəsində iyunun 1-3 tarixlərində İstanbulun Fuar Mərkəzində iştirakçı 135 ölkənin tanıtım stendlərinin nümayiş etdirildiyini, burada Türkiyədən sonra ən böyük pavilyonla Azərbaycanın təmsil olunduğunu söylədi. Ölkəmizin tanıtım stendi ilə tanışlıqdan sonra İstanbulun Fuar Mərkəzinin açıq havada qurulmuş böyük səhnəsində Azərbaycana həsr olunan konsert proqramı isə minlərlə tamaşaçı tərəfindən böyük  maraqla  izlənilərək alqışlarla qarşılanmışdır.

Olimpiadanın yekunları barədə tədbir iştirakçılarına ətraflı məlumat verən Mesut bəy daha sonra Azərbaycan şagirdlərinin bu nüfuzlu yarışda qazandıqları uğurlardan söz açdı. Qeyd etdi ki, Türkiyədə 14 nominasiya üzrə keçirilmiş  X Beynəlxalq Türk Dili Olimpiadasında respublikamızı təmsil edən məktəblilərimiz 13 qızıl, 10 gümüş və 3 bürünc olmaqla bütövlükdə 26 medal qazandılar. O,sevinc hissi ilə bildirdi ki, Azərbaycan bu olimpiadada ən çox medal qazanan ölkə olub. Ümumiyyətlə, Beynəlxalq Türk Dili Olimpiadasının  keçirildiyi 10 il ərzində şagirdlərimiz 35 qızıl, 48 gümüş, 20 bürünc medala layiq görülüblər. Azərbaycan məktəblilərinin əldə etdiyi nailiyyətlərdən qürur duyduğunu deyən Mesut Kurnaz bir daha hamını təbrik etdi.

Olimpiadada yüksək səviyyədə çıxışlarına görə qaliblərə diplom və pul mükafatları təqdim edən Yeni Azərbaycan Partiyasının Səbail Rayon Təşkilatının sədri Zahid Qaralov, Milli Televiziya və Radio Şurasının sədri Nuşirəvan Məhərrəmli onlara uğurlar arzuladılar, əsas təşkilatçısı Türkcə Öyrətim Mərkəzi olan Beynəlxalq Türk Dili Olimpiadasının Azərbaycandakı tərəfdaşı "Çağ" Öyrətim İşlətmələri Şirkətinin ölkəmizdəki fəaliyyətini müsbət dəyərləndirdilər.

Qaliblərə ən xoş istəklərini çatdıran Milli Məclisin deputatları Azər Badamov, Tahir Rzayev respublikamızda kifayət qədər yüksək intellektə, biliyə malik istedadlı yeniyetmə və gənclərin olduğunu, onların ölkəmizin hüdudlarından kənarda müxtəlif mövzularda keçirilən  bilik yarışlarında, beynəlxalq olimpiadalarda, müsabiqələrdə layiqli yer tutduqlarını qeyd etdilər.

"Çağ" Öyrətim İşlətmələri Şirkəti İdarə Heyətinin sədri Ənvər Özərən çıxış üçün söz alaraq X Beynəlxalq Türk Dili Olimpiadasında  məktəblilərimizin əldə etdiyi nailiyyətlərdən razılıq hissi ilə danışdı, onların Azərbaycanı  bu möhtəşəm yarışmada layiqincə təmsil etdiklərini söylədi.  Qeyd etdi ki, olimpiadada iştirak edən məktəblilərimizin uğurlu iştirakı dünyanın 135 ölkəsindən gələn ayrı-ayrı millətləri, dinləri, irqləri təmsil edən  insanların respublikamızı yaxından tanımasına imkan verdi. Olimpiadanın keçirilməsində əməyi olanlara öz təşəkkürünü bildirən Ənvər Özərən vətənə medallarla dönən məktəblilərimizə müvəffəqiyyətlər dilədi. 

Tədbir olimpiadada uğur qazanan Azərbaycan nümayəndə heyətinin üzvlərinin ifasında maraqlı konsert proqramı ilə davam etdi.  

Samirə KƏRİMOVA