Bu günlərdə Parisdə "Paris səması" adlı  beynəlxalq mahnı festivalı keçirilib. Rusiya, Belarus, Ukrayna, Qazaxıstan, Özbəkistan, Moldova, Fransa, İsveçrə və digər ölkələrdən müxtəlif yaş qruplarında 300-dən artıq ifaçının iştirak etdiyi musiqi yarışmasında ölkəmizi  Azərbaycan Dövlət Uşaq Filarmoniyasının solisti İslam Qasımov təmsil edib.

Festivalda rəqs, teatr, estrada və akademik vokal, musiqi alətlərində ifa nominasiyaları üzrə qaliblər müəyyənləşib. 14 yaşlı vokalçımız İslam Qasımov "Akademik vokal" nominasiyası üzrə I yerə layiq görülüb. Müsabiqədə İslam Azərbaycanın görkəmli bəstəkarı Tofiq Quliyevin "Bakı haqqında mahnı" və italyan bəstəkarı E.Kurtisin "Sorentaya qayıt" əsərlərini ifa edib. Azərbaycanlı vokalçı İslam Qasımovun çıxışı münsiflər heyəti tərəfindən bəyənilərək alqışlarla qarşılanıb və o, beynəlxalq mahnı festivalının qalibi olub. Müsabiqədə gənc vokalçının müəllimi Məryəm Babayevanın da əməyi yüksək qiymətləndirilib. 

Samirə  KƏRİMOVA