Sumqayıtda veteran müəllimlərin çağırışçı gənclərlə görüşü artıq ənənə halını alıb. Yay çağırışı ilə əlaqədar təşkil olunan budəfəki görüş də yaddaqalan olub. Tədbirdə Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin Sumqayıt şəhər idarəsi rəisi vəzifəsinin icraçısı, Qarabağ müharibəsi veteranı polkovnik-leytenant Allahverdi Qasımov, hərbi prokurorun müavini Elçin Hacıyev, Cümə məscidinin axundu Hacı Rauf, şəhər təhsil işçiləri veteranlar şurasının sədri Məşdi Zeynalov, müharibə veteranı Mirməmməd Əliyev Vətənə məhəbbət, ana torpağa bağlılıq, yağı düşmənə nifrət ruhlu çıxışlar ediblər.

Görüşdə 3, 5, 13, 14,17 23, 29 nömrəli tam orta məktəblərin müəllimləri M.Muradov, H.Mahmudov, A.Yusifov, T.Rufullayev, Z.Məmmədov, M.İsgəndərov, Ş.İsmayılov, S.Əliyev və başqaları öz çıxışlarında Azərbaycanın qəhrəman oğullarının döyüş yollarından böyük qürur hissi ilə söz açıb, əsgəri xidmətə yola düşən gənclərə  ən ülvi arzularını bildiriblər.

Bu maraqlı görüş konsert proqramı ilə sona yetib. 

Ə.DAŞDƏMİRLİ