"Oriqami" Uşaq və Yeniyetmələr İctimai Birliyi 2006-cı ildən etibarən hər il Qusar rayonunun dilbər guşələrindən olan Yasab kəndində xüsusi qayğıya ehtiyacı olan uşaqlar üçün yay-sağlamlıq düşərgəsi təşkil edir. İctimai Birliyin sədri Namiq Nəcəfovun verdiyi məlumata görə, bu il də Yasab kəndində açılmış yay-sağlamlıq düşərgəsində 50 nəfər 5-16 yaşlı xüsusi qayğıya ehtiyacı olan, valideyn himayəsindən məhrum uşaq və şəhid ailələrinin övladları dincəlib.

İyulun 1-dən 20-dək davam edən düşərgə həyatı dövründə uşaqlar istirahət etməklə yanaşı "Oriqami" İctimai Birliyinin fiziki və əqli cəhətdən qüsurlu uşaqlarla həyata keçirdiyi bərpa-inkişaf tədbirləri ilə də əhatə olunublar. 50 uşağın düşərgədə yay istirahətinin səmərəli təşkili, rasional və yüksək kalorili qidalarla təmin olunması, əyləncəsi, asudə vaxtlarını maraqlı və məzmunlu keçirmələri, uşaqların fərdi və komandalı oyunlara cəlb edilməsi, onlarla yarışların təşkili İctimai Birlikdə tərtib edilmiş pedaqoji yönümlü proqram əsasında həyata keçirilib.

Uşaqlar düşərgədə olduqları müddətdə bir neçə dəfə ərazidəki meşə massivinə, bulaqlara, çay kənarına ekskursiyaya gediblər, təşkilatçı, psixoloq və tərbiyəçilər onlarla ətraf mühit, təbiət haqqında söhbətlər aparıblar.  İyulun 20-də yay-sağlamlıq düşərgəsinin bağlanış mərasimi olub. Mərasimdə çıxış edən uşaqlar düşərgədən zəngin təəssüratla ayrıldıqlarını bilbiriblər. Tədbirdə "Oriqami" İctimai Birliyi tərəfindən uşaqlara hədiyyələr verilib.

Xüsusi qayğıya ehtiyacı olan uşaqların yay istirahəti paytaxtın Suraxanı Rayon İcra Hakimiyyətinin təşkilati, Azərbaycan Respublikası Gənclər və İdman Nazirliyinin maliyyə dəstəyi ilə həyata keçirilib. 

Y.ƏLİYEV