Bakı Dövlət Universitetinin (BDU) biologiya fakültəsinin nəzdində Carl Zeiss optik mikroskopiya  laboratoriyasının açılışı olub. Laboratoriyanın avadanlığı BDU-nun istifadəsinə Carl Zeiss şirkətinin Azərbaycan təmsilçisi olan OPTEC şirkəti tərəfindən verilib. Laboratoriya 10 ədəd Primo Star tədris mikroskopları ilə təchiz edilib, onlardan beşinin komplektinə rəqəmsal kameralar və zəruri proqram təminatı daxildir. Mərasimdə OPTEC B.V. (Hollandiya) şirkətinin menecer direktoru Aleksandr Fon Korff, OPTEC şirkətinin Azərbaycan nümayəndəliyinin direktotu Nataliya Həmzəyeva və digər qonaqlar iştirak edib.

Laboratoriyanı BDU-nun rektoru, akademik Abel Məhərrəmov və OPTEC B.V. şirkətinin menecer direktoru Aleksandr Fon Korff açıblar. Tədris laboratoriyasının açılışından sonra rektor Abel Məhərrəmov və Aleksandr Fon Korff əməkdaşlıq barədə memorandum imzalayıblar. Sənədə əsasən OPTEC və BDU-nun bazasında müntəzəm olaraq elmi-praktiki və təhsil seminarlarının keçirilməsi barədə razılığa gəlinib.

BDU-nun bazasında həmçinin peşə hazırlığı, lazer skaner mikroskopiyası və rəqəmli təsvirin analizi üçün laboratoriyaları olan Carl Zeiss arayış mərkəzinin yaradılması planlaşdırılır.

Rektor Abel Məhərrəmov bildirib ki, bizim məqsədimiz  gənc alimlər üçün rahat iş şəraiti yaratmaq, onları ən müasir avadanlıqla təmin etməkdir. Çünki Azərbaycanda elmin gələcəyini müəyyən edən impulsu onlar məhz BDU-da alırlar. Buna görə də yüksək texnologiya istiqamətində dünya liderləri ilə əməkdaşlıq bizim strateji xəttimizdir. 

BDU-nun Mətbuat və informasiya şöbəsi