İyulun 25-də Azərbaycan Respublikası Dövlət Neft Şirkətində (ARDNŞ) Bakı Ali Neft Məktəbinin (BANM) fəaliyyətinin təşkili ilə bağlı mətbuat konfransı keçirilmişdir.

AzərTAc xəbər verir ki, BANM-ın rektoru Elmar Qasımov çıxış edərək bu ali təhsil ocağının Prezident İlham Əliyevin 2011-ci il 29 noyabr tarixli Fərmanı ilə ARDNŞ-in strukturunda yaradıldığını bildirmişdir. Qeyd etmişdir ki, bu ilin sentyabr ayında "Neft-qaz mühəndisliyi" və "Kimya mühəndisliyi" ixtisasları üzrə 100 tələbənin məktəbə qəbulu nəzərdə tutulmuşdur.

Böyük Britaniyanın "Heriot-Vatt" Universiteti ilə əməkdaşlıq əlaqələrinin qurulduğu və həmin universitetin tədris proqramlarının tətbiqinə başlanıldığını bildirən E.Qasımov məhz bu səbəbdən məzunlara iki diplom veriləcəyini diqqətə çatdırmışdır. Bildirmişdir ki, BANM üçün ayrılmış Xocalı prospekti, 30 ünvanında yerləşən binada hazırda təmir işləri aparılır, həmçinin tədrisin təşkili üçün zəruri infrastrukturun yaradılması, idarəetmə və professor-müəllim heyətinin formalaşdırılması istiqamətində də işlər görülmüşdür.

Rektor son 4 ayda BANM-a tələbə qəbulu ilə bağlı məktəblərdə, liseylərdə XI sinif şagirdləri ilə görüşlərin keçirildiyini, "Abituriyent" jurnalının 1-3-cü saylarında və televiziya kanallarında informasiya xarakterli aksiyaların təşkil edildiyini və qəbul imtahanlarında yüksək bal toplamış abituriyentlərin ali məktəbin tələbələrinin sırasına qoşulacağına ümidvar olduğunu bildirmişdir.