İREX "Yeni media layihəsi" çərçivəsində Azərbaycanın 17 regionunda məktəblilərin tədqiqat layihəsini həyata keçirir. Layihənin keçirilməsində əsas məqsəd şagirdlərin İnternetdən istifadə ilə bağlı axtarış qabiliyyətlərinin inkişafına dəstək olmaqdır. Hər il layihə üzrə müxtəlif mövzular işlənib hazırlanır. Builki layihənin mövzusu Bakıda keçirilən "Eurovision-2012" mahnı müsabiqəsi ilə bağlı "Eurovision mənim üçün və ölkəm üçün nə vəd edir?" adlanır.

İsmayıllı şəhər A.Aslanov adına 2 nömrəli tam orta məktəbin Azərbaycan dili və ədəbiyyat müəllimi Eminə Orucovadan aldığımız məlumatda bildirilir ki, bu günlərdə  rayon təhsil şöbəsinin binasında yaradılan İREX İcma Mərkəzində "Məktəb şagirdlərinin tədqiqat layihəsi"nin təqdimat mərasimi keçirilib. Mərasimi təşkilatın İsmayıllı Rayon İcma Mərkəzinin koordinatoru Firdovsi Cavadov açdıqdan sonra müsabiqə, onun keçirilmə qaydaları, işlərin yoxlanılma mexanizmi, nəticələri barədə məlumat verilib.

Tədbirdə İsmayıllı Rayon Təhsil Şöbəsinin müdir müavini Rahim Baxışov layihənin təhsilə göstərdiyi müsbət təsirdən söhbət açıb. Bundan sonra mükafatların təqdimatı olub.

Əvvəlcə III yerin qalibi, rayonun Cülyan kənd tam orta məktəbinin şagirdi və müəllimi fleşkart və sertifikatla mükafatlandırılıb.

II yerin sahibi, İsmayılli şəhər A.Aslanov adına 2 nömrəli tam orta məktəbin X sinif şagirdi Xəyalə Ələkbərovaya flipkamera və sertifikat, I yerin qalibi, həmin məktəbin X sinif şagirdi Zaur Ağazadəyə isə netbuk və sertifikat verilib. I və II yerin qaliblərinin rəhbəri, həmin məktəbin Azərbaycan dili və ədəbiyyat müəllimi Eminə Orucova da netbuk, fleşkart və sertifikata layiq görülüb.

Mərasimin sonunda çıxış edən İsmayıllı şəhər 2 nömrəli tam orta məktəbin direktoru Ramil Dadaşov müsabiqədə I və II yerə layiq görülən  Xəyalə  ilə Zaurun əlaçı şagird olduqlarını və onların Təhsil Nazirliyinin keçirdiyi "Elektron təhsil" müsabiqəsində Eminə Orucovanın rəhbərliyi ilə "Vətənim Azərbaycan" bloqu ilə iştirak etdiklərini də diqqətə çatdırıb.  

ƏDALƏT