Çin Xalq Respublikasında təhsil alan azərbaycanlı tələbə Vüsal Qurbanov bu ölkənin ən nüfuzlu ali təhsil ocaqlarından olan Tsinghua Universitetinin hüquq fakültəsini bitirmişdir. Tsinghua Universitetinin ilk azərbaycanlı məzunu olan V.Qurbanov dünyanın 60-dan çox ölkəsini təmsil edən 289 məzundan biridir.

Azərbaycanlı tələbənin diplom işinin mövzusu isə "Xocalı beynəlxalq soyqırımı cinayətidir" olmuşdur. Çin ictimaiyyətini, elmi dairələri Xocalı faciəsi haqqında daha yaxından tanıtmaq məqsədi daşıyan bu diplom işi universitetin ən yaxşı diplom işinə namizəd irəli sürülmüş və ölkənin 6 ən qabaqcıl universitetinin hüquq fakültəsi müəllimlərinin rəyi ilə yekdilliklə qəbul olunmuşdur. Mövzu BMT-nin keçmiş Yuqoslaviya üzrə Beynəlxalq Tribunalında prokuror köməkçisi işləmiş professor Cia BinBinqin marağına səbəb olmuşdur. O, Azərbaycanın haqlı mövqeyini təsdiqləmiş, beynəlxalq ədalət məhkəməsində bu işə düzgün qiymət verilməsi haqqında məsləhətlərini bildirmişdir.

Tələbəmiz gələcəkdə bu mövzuda Çində kitab nəşr etdirməyi də planlaşdırır.

2005-ci ildən Çində bakalavr təhsili alan V.Qurbanov Azərbaycan gənclərinin xarici ölkələrdə təhsili üzrə Dövlət Proqramı çərçivəsində Çində magistr təhsili alan ilk azərbaycanlı tələbə adına layiq görülmüşdür. O, Çində təhsil alan azərbaycanlı tələbələrin təşkilatlanması işində də fəallıq göstərmiş, Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu - ASAİF-in bu ölkədəki nümayəndəsi olmuşdur. 

AzərTAc