NDU-da
dördüncü çağırış Naxçıvan Muxtar Respublikası Ali
Məclisinin beşinci sessiyası və Naxçıvan Dövlət
Universiteti qarşısında duran vəzifələrə həsr olunmuş
yığıncaq keçirilmişdir. Yığıncağı giriş sözü ilə açan
universitetin rektoru, akademik İsa Həbibbəyli
sessiyanın muxtar respublikanın ali təhsil
müəssisələrinin qarşısında qoyduğu prioritet
vəzifələrdən danışmışdır. Rektor Naxçıvan Dövlət
Universitetinin son yarım illik fəaliyyətinə nəzər
salaraq Boloniya sisteminin tətbiqi, elmi kadr
hazırlığı, informasiya-kommunikasiya vasitələrindən
geniş istifadə, beynəlxalq əlaqələr sahəsində
əhəmiyyətli nailiyyətlər əldə olunduğunu vurğulamışdır.
Belə ki, 2011-2012-ci tədris ilində universitetdə
bakalavr və magistratura pilləsi üzrə yeni ixtisaslar
açılmış, Boloniya sisteminin tətbiqi vasitəsilə tədrisdə
yüksək kəmiyyət və keyfiyyət göstəriciləri əldə olunmuş,
bir sıra beynəlxalq konfrans və simpoziumlar təşkil
edilmişdir. Universitetin maddi-texniki bazasının
yaxşılaşdırılmasına gəlincə, muxtar respublika
rəhbərliyinin qayğısı ilə təbiətşünaslıq və kənd
təsərrüfatının əsaslı şəkildə yenidən qurulmuş binası
yeni tədris ilində istifadəyə veriləcək. Beynəlxalq
əlaqələrin inkişafına gəldikdə isə, universitet TEMPUS
proqramı çərçivəsində həyata keçirilən 5 layihənin
iştirakçısıdır. 60-dan çox dünya universiteti ilə
əməkdaşlıq edən bu ali məktəb bu yaxınlarda Türkiyə
Cümhuriyyətinin Ərzincan Universiteti, Gürcüstanın Şota
Rustaveli adına Batumi Dövlət Universiteti ilə
əməkdaşlıq müqavilələri imzalamışdır. Dünya
universitetləri ilə virtual əlaqələr, tələbə və təcrübə
mübadiləsi daha da inkişaf etdiriləcək. Universitet
məzunlarının işlə təmin olunması da muxtar respublika
rəhbərliyinin diqqət mərkəzindədir. Belə ki, bu il
magistratura pilləsində ali təhsilini başa vuran 17
nəfər artıq ixtisaslı mütəxəssis kimi əmək fəaliyyətinə
başlamışdır.
Rektor
sessiyada qarşıda qoyulan mühüm vəzifələrdən olan elmi
kadr hazırlığı məsələsinə də toxunaraq Avropa dilləri,
incəsənət ixtisasları üzrə elmi kadrların hazırlanmasına
diqqətin artırılacağını vurğulamışdır. Rektor, akademik
İsa Həbibbəyli çıxışının sonunda sessiyada Naxçıvan
Muxtar Respublikası Ali Məclisinin sədri Vasif Talıbovun
ali təhsil işçilərinin gələcək fəaliyyət istiqamətlərini
müəyyənləşdirən proqram xarakterli çıxışında qarşıya
qoyulan vəzifələrin həyata keçirilməsi üçün kollektivin
var qüvvəsi ilə çalışacağını bildirmişdir.
Tərbiyə işləri üzrə prorektor, fəlsəfə elmləri doktoru,
professor Məmməd Rzayev universitetdə mədəni mühitin
inkişafı, 2012-ci ilin Azərbaycan Respublikasının
Prezidenti İlham Əliyev tərəfindən "İdman ili", Naxçıvan
Muxtar Respublikası Ali Məclisinin sədri Vasif Talıbov
tərəfindən "Milli dəyərlər ili" elan olunması ilə bağlı
universitetdə son 6 ay ərzində görülən işlər barədə
məlumat vermiş, milli mənəvi dəyərlərin təbliği ilə
bağlı müxtəlif konfransların, mədəni-kütləvi
tədbirlərin, müxtəlif idman yarışlarının təşkil
olunduğunu diqqətə çatdırmışdır.
Beynəlxalq münasibətlər və xarici dillər fakültəsinin
dekanı, filologiya üzrə fəlsəfə doktoru, dosent Qurban
Qurbanlı fakültədə İKT vasitəsilə, müxtəlif dillərdə
viktorina və müsabiqələrin təşkil olunmasından
danışmışdır.
Mühasibat uçotu və maliyyə kafedrasının baş müəllimi,
iqtisad elmləri üzrə fəlsəfə doktoru Mehriban İmanova
qeyd etmişdir ki, sessiyada 2012-ci ilin birinci
yarısında Naxçıvan Muxtar Respublikasının
sosial-iqtisadi inkişafının əsas göstəriciləri,
quruculuq işləri öz əksini tapmışdır.
Magistratura üzrə dekan, dosent Etibar Məmmədov
2011-2012-ci tədris ilində universitetdə magistratura
təhsil pilləsində 20 istiqamət, 30 ixtisaslaşma üzrə
kadr hazırlığı aparıldığını, 262 magistrantın təhsil
aldığını bildirmiş, buradakı Azərbaycanşünaslıq Mərkəzi
və Tələbə Turizm Assosiasiyasının fəaliyyəti barədə
məlumat vermişdir. Qeyd olunmuşdur ki, 2011-2012-ci
tədris ilinin ikinci yarısında 23 ixtisaslaşma üzrə 71
magistrant magistr dissertasiyasını uğurla müdafiə
etmişdir. 2012-2013-cü tədris ilində isə universitetdə
magistratura üzrə 160 plan yeri nəzərdə tutulmuşdur.
İnformasiya-kommunikasiya texnologiyaları şöbəsinin
müdiri Xaliq Babayev universitetin yüksək sürətli
İnternetlə, informasiya-kommunikasiya texnologiyaları
ilə təmin olunması, "Polycom" HD 8000 markalı ən müasir
internet-konfrans kamerası vasitəsilə beynəlxalq
səviyyəli videokonfransların təşkil olunması barədə
məlumat vermişdir.
Pedaqoji fakültədə akademik məsləhətçi işləyən Ruhəngiz
Əliyeva, universitet Tələbə İnformasiya Mərkəzinin
sədri, beynəlxalq münasibətlər və xarici dillər
fakültəsinin III kurs tələbəsi Aytən İsmayılova da
sessiyanın yüksək ixtisaslı mütəxəssislərin yetişməsi,
yerli elmi kadr potensialının artırılması istiqamətində
qarşıya qoyduğu mühüm vəzifələrdən bəhs etmişlər.
Mehriban SULTAN,
NDU-nun Mətbuat şöbəsinin müdiri |