21
iyul - 2 avqust tarixlərində ölkəmizin ümumi təhsil
müəssisələrinin 15 şagirdi Ukraynada yerləşən "Artek"
Beynəlxalq Uşaq Mərkəzində (BUM) keçirilmiş "Dünyanı
yaxşılığa doğru dəyişək!" adlı XI beynəlxalq uşaq
festivalında iştirak edib. Festivala qatılan
azərbaycanlı şagirdlərin 8-i Bakı Avropa Liseyindən,
2-si Bakı Dövlət Universitetinin nəzdindəki "Gənc
istedadlar" Liseyindən, digər şagirdlər isə "Çağ"
Öyrətim İşlətmələri Bakı Özəl Türk Liseyindən, "Ankara
məktəbi" məktəb-liseyindən, Bakı şəhərindəki 159 və 167
nömrəli orta məktəblərdən, habelə Masallı rayonundakı
"Dəfinə" məktəb-liseyindəndir.
Qeyd edək ki, Krım yarımadasının Qurzuf qəsəbəsində
yerləşən "Artek" Beynəlxalq Uşaq Mərkəzi 1925-ci ildən
fəaliyyət göstərir. 2001-ci ildən etibarən "Artek"
BUM-da "Dünyanı yaxşılığa doğru dəyişək!" adlı
beynəlxalq uşaq festivalı keçirilir. Ötən dövrdə
festivalda dünyanın 60 ölkəsindən 4000 nəfərdən artıq
uşaq iştirak edib. Festivalın əsas məqsədi mədəni
inteqrasiya və tolerantlıq, bərabərlik və uşaqlarda
fikir azadlığı prinsiplərinin formalaşmasına dəstək
verməkdən ibarətdir.
"Dünyanı yaxşılığa doğru dəyişək!" beynəlxalq uşaq
festivalının təşkilatçıları - Ümid və Xeyirxahlıq
Ümumukrayna Xeyriyyə Fondu və "Artek" BUM-dur.
Azərbaycanlı şagirdlərin bu festivalda iştirakı
Azərbaycan Respublikası Ailə, Qadın və Uşaq Problemləri
üzrə Dövlət Komitəsinin təşəbbüsü ilə təşkil olunub.
Azərbaycan nümayəndə heyətinə Bakı Avropa Liseyinin
müəllimi Alyona Sazonova rəhbərlik edib.
"Ümumdünya
Uşaq Millətlər Liqası" beynəlxalq təşkilatı Baş
Assambleyasının sessiyaları və "İstedadlar planeti" adlı
mədəni proqramın keçirilməsi üzrə iki əsas hissədən
ibarət olan festival zamanı Azərbaycanı təmsil edən
nümayəndə heyəti bütün sahələrdə fəallıq göstərərək
yüksək nəticələr qazanıb. Bakı Avropa Liseyinin X sinif
şagirdi Saleh Cəfərov Azərbaycan təmsilçisi kimi ilk
dəfə olaraq "Ümumdünya Uşaq Millətlər Liqası" beynəlxalq
təşkilatının sədri vəzifəsinə seçilib. O, qarşıdakı bir
ildə 54 ölkənin 17 milli koordinatorunun fəaliyyətini
tənzimləyəcək.
Onu da qeyd edək ki, "Ümumdünya Uşaq Millətlər Liqası"
beynəlxalq təşkilatı 2009-cu ildə yaradılıb. Liqanın
fəaliyyətində uşaq ictimai təşkilatlarının liderləri,
gənc parlament üzvləri və jurnalistlər yaxından iştirak
edirlər.
Bakı Avropa Liseyinin X sinif şagirdi Rafael Hacıbəyli
"Ümumdünya Uşaq Millətlər Liqası"nda 17 yaxşı işlər
səfirlərindən biri kimi "Sağlam olmaq dəbdədir!"
mövzusunun koordinatoru seçilib. O, məhz bu sahədə digər
54 ölkə üzrə müvafiq işlərin əlaqələndirilməsini həyata
keçirəcək.
Liseyin
VIII sinif şagirdi Fidan İsmayılova beynəlxalq uşaq
press-mərkəzinin işində fəal iştirakına görə fəxri
fərmanla təltif edilib. O, 2013-cü ilin mayında Kiyev
şəhərində keçiriləcək beynəlxalq jurnalistlər
festivalına dəvət olunub.
"Yantarnıy" düşərgəsində keçirilmiş şahmat turnirinin
hər üç qalibi Azərbaycan təmsilçiləri olub. Belə ki,
Bakı Avropa Liseyinin şagirdləri Saleh Cəfərov I, Murad
İsmayılov II, Rafael Hacıbəyli isə III yerə layiq
görülüblər. Eyni zamanda Saleh Cəfərov şəxsi hesabda
"Artek" üzrə şahmat turnirinin qalibi adına layiq
görülüb.
Onu da qeyd edək ki, azərbaycanlı şagirdlər bir ay
ərzində gündəlik məşqlər nəticəsində hazırladıqları 4
mahnı və 2 rəqs kompozisiyası ilə digər ölkələrdən olan
peşəkar kollektivlərlə bərabər "İstedadlar planeti"
mədəni proqramında çıxış edərək laureatlar sırasında ilk
onluğa daxil olublar.
İştirakçı ölkə günlərinin keçirilməsi zamanı hazırlanmış
materialların sayını nəzərə alaraq, Azərbaycana əlavə
olaraq daha bir "təqdimat çadırı" ayrılıb. Azərbaycanlı
şagirdlər Azərbaycana həsr olunmuş müxtəlif yarış,
viktorina və oyunlar təşkil edib və qaliblər milli
rəmzlərlə zəngin suvenir və həvəsləndirici hədiyyələrlə
mükafatlandırılıblar. Digər ölkələrdən olan uşaqlara
Azərbaycanın adət-ənənələri, mədəniyyət və tarixi barədə
ətraflı məlumat verilib və onlar milli şirniyyatlara
qonaq ediliblər.
Azərbaycanlı şagirdlər, həmçinin "Dəstələrin təqdimatı"
yarışında "Ən mülayim" nominasiyası üzrə qalib gəliblər.
Eləcə də "Festival "Artek" üzrə addımlayır" aksiyası
çərçivəsində "Ozyornıy" və "Morskoy" düşərgələrindəki
çıxışlarına görə ölkəmizi təmsil edən şagirdlər xüsusi
diplom əldə ediblər.
Festivalın 54 iştirakçı-ölkədən olan uşaqlarla ünsiyyət
zamanı bizim şagirdlərə geniş maraq dairəsi və istedadlı
olmaları çox kömək edib. Müxtəlif dilləri bilmələri və
aktiv ünsiyyət həvəsi isə digər uşaqlarda qürur hissi
yaradırdı.
Azərbaycanlı şagirdlər Vətənə yola salınarkən Danimarka,
Paraqvay, Bəhreyn, Əlcəzair, Tunis, Almaniya, Serbiya,
Ukrayna və digər ölkələrdən olan uşaqlar göz yaşlarını
gizlədə bilmirdilər.
Belə maraqlı festivala məktəblilərimizin göndərilməsinə
dəstək göstərdiyinə görə Azərbaycan Respublikası Ailə,
Qadın və Uşaq Problemləri üzrə Dövlət Komitəsinə dərin
minnətdarlığımızı bildirir və ümid edirik ki, gələcəkdə
də hər səhər "Artek"in baş meydanında ilk olaraq
Azərbaycan bayrağı qaldırılacaq.
Fidan İSMAYILOVA,
Bakı Avropa Liseyinin VIII sinif şagirdi |