Məktəblilərin
yay istirahətinin səmərəli və yaddaqalan təşkili ilə
bağlı Səbail Rayon İcra Hakimiyyətinin təşəbbüsü, Quba
Rayon İcra Hakimiyyəti, DİN Daxili Qoşunlar Komandanlığı
və "Çağ" Öyrətim Şirkətinin birgə layihəsi əsasında
rayonun Qarabağ müharibəsi əlilləri və veteranlarının,
aztəminatlı və imkansız ailələrin uşaqları, təhsildə və
idmanda fərqlənən şagirdlər, həmçinin "SOS-Azərbaycan"
uşaq kəndində tərbiyə alan, eyni zamanda bir sıra
ictimai birlikləri təmsil edən uşaq və yeniyetmələr
üçün ənənəvi olaraq Quba şəhərinin ən mənzərəli yerində
istirahət düşərgəsi yaradılmışdır. Bakı Türk Liseyinin
Quba filialının bazasında yaradılmış
hərbi-vətənpərvərlik təmayüllü, "Şahinlər" adlı həmin
yay istirahət düşərgəsinə bu günlərdə 250 uşaq yola
salınmışdır. Bu münasibətlə keçirilən tədbir Daxili
Qoşunların hərbi orkestri tərəfindən Azərbaycan
Respublikasının Dövlət himninin ifası ilə başlanmışdır.
"Sahil bağı"nda təşkil olunan yolasalma mərasimində
çıxış edən Səbail Rayon İcra Hakimiyyətinin başçısı Asif
Əsgərov ölkə Prezidenti cənab İlham Əliyevin yeniyetmə
və gənclərimizin sağlam böyüməsi, gənc nəslin vətənə
məhəbbət, Azərbaycan dövlətçiliyinə sədaqət ruhunda
tərbiyə olunması istiqamətində gördüyü işlərdən,
yeniyetmələrə olan diqqət və qayğıdan, bu istiqamətdə
Səbail rayonunda həyata keçirilən layihələrdən
danışmışdır.
Azərbaycan Respublikasının ombudsmanı Elmira Süleymanova
da çıxış edərək uşaqlara xoş istirahət arzulamışdır.
Qeyd etmək lazımdır ki, düşərgənin hərbi-vətənpərvərlik
təmayüllü olması nəzərə alınaraq Səbail RİH tərəfindən
bir sıra təşkilati işlər həyata keçirilmiş, bir neçə gün
əvvəl istirahətə göndərilən uşaqlar və onların
valideynləri, dəstə rəhbərləri ilə görüş keçirilərək
düşərgədə istirahətin təşkili, daxili qaydalar,
keçiriləcək tədbirlər barədə ətraflı məlumat
verilmişdir. Uşaqlar üçün xüsusi geyim və forma, lazımi
idman ləvazimatları alınmış, Daxili Qoşunların Quba
şəhərindəki "N" saylı hərbi hissəsi tərəfindən
düşərgənin həyətində hərbi-səhra çadırları, səhra
yeməkxanası qurulmuş, Daxili Qoşunlar, DQ-ın yaranması,
vəzifələri və döyüş yolu, buradakı xidmət, döyüş
texnikası və təminatı barədə, həmçinin Azərbaycanın
Milli Qəhrəmanı Mübariz İbrahimova və "Şahinlər"
düşərgəsinin əvvəlki illərinə həsr olunmuş stendlər
quraşdırılmışdır.
Düşərgə Daxili Qoşunlar Komandanlığı və Bakı Özəl Türk
Liseyinin Quba filialı tərəfindən tələb olunan bütün
ləvazimatlarla təmin olunmuşdur. Düşərgədə yeniyetmələr
gündə 4 dəfə yüksək kalorili yeməklə, təzə meyvə və
tərəvəz, süd məhsulları ilə təmin ediləcək, istirahət
dövründə onlar üçün bir neçə dəfə təbiət qoynunda nahar
təşkil olunacaqdır.
Bu il də düşərgədə uşaqların təlim-tərbiyə işləri ilə
rayonun orta məktəblərində çalışan fiziki tərbiyə
müəllimləri və gənclərin çağırışaqədərki hazırlığı
rəhbərləri məşğul olacaqlar. Onlarla yanaşı Daxili
Qoşunların zabitləri, çavuş və əsgərlərindən ibarət
qrup da düşərgəyə təhkim olunmuşdur. Onlar burada
aparılacaq hərbi-hazırlıq, təlim-tərbiyə işlərində
yaxından iştirak edəcəklər. Düşərgədə uşaqların
istirahətinin daha maraqlı və yaddaqalan edilməsi üçün
burada məşğələlər hərbi nizamnaməyə uyğun tərzdə
hərbçilər tərəfindən keçiriləcəkdir.
İstirahət günlərində şagirdlərin Qubanın görməli
yerlərinə, meşələrə, rayonun tarixi guşələrinə
gəzintiləri, Daxili Qoşunların Qubadakı hərbi hissəsi
ilə tanışlığı planlaşdırılıb.
Yola düşməzdən əvvəl gənc "Şahinlər" ulu öndər Heydər
Əliyevin abidəsini ziyarət etmiş, abidə önünə əklil
qoymuş və tər çiçəklər düzmüşlər.
Y.ƏLİYEV |