XXX
London Yay Olimpiya Oyunlarında 60 kiloqram çəki
dərəcəsində mübarizə aparan sərbəst güləşçimiz Toğrul
Əsgərov Azərbaycana ilk qızıl medalı qazandırmışdır.
Əhsən sənə, olimpiya çempionu Toğrul!
AzərTAc xəbər verir ki, Tim Şleyçer (Almaniya) və Keniçi
Yumota (Yaponiya) üzərində inamlı qələbə qazanan
T.Əsgərov yarımfinalda ABŞ idmançısı Koleman Skottu
məğlub edərək həlledici mərhələyə adlamışdır. Finalda
güləşçimizin rəqibi Rusiya idmançısı Besik Kuduxov
olmuşdur. Gərgin idman mübarizəsi şəraitində keçən
görüşdə T.Əsgərov qələbə qazanaraq fəxri kürsünün ən
yüksək pilləsinə qalxmışdır.
London Olimpiadasında möhtəşəm qələbə şərəfinə
Azərbaycanın Dövlət himni səsləndi və üçrəngli
bayrağımız qaldırıldı.
***
Böyük
Britaniyanın paytaxtı Londonda XXX Yay Olimpiya
Oyunlarında Azərbaycana ikinci qızıl medalı sərbəst
güləşçimiz Şərif Şərifov qazandırdı.
AzərTAc xəbər verir ki, yarışda 84 kiloqram çəki
dərəcəsində mübarizə aparan Şərif Şərifov final görüşünü
də qələbə ilə başa vurdu.
İbrahim Bölükbaşı (Türkiyə) və Ceke Herberti (ABŞ)
məğlub edən güləşçimiz yarımfinala yüksəldi. Bu
mərhələdə iranlı Naser Ehsan Laşgari ilə görüşdə
Azərbaycan güləşçisi xalçadan qalib ayrıldı. Final
görüşündə Puerto Riko idmançısı Yuseot Caime Espinala
qalib gələn Ş.Şərifov Azərbaycan yığmasına ikinci qızıl
medalı qazandırdı. Qoluna qüvvət, Şərif!
Beləliklə, Londonda ikinci dəfə Azərbaycanın himni
səsləndi, bayrağı ən yüksəyə qalxdı. |