Javascript DHTML Drop Down Menu Powered by dhtml-menu-builder.com

Ana səhifə Seçilmişlərə əlavə et Bizə yazın

 

ARXİV

17 Avqust 2012 - №32

 

Naxçıvan Dövlət Universitetinin tələbələri Türkiyədə təcrübə keçiblər

 

Naxçıvan Dövlət Universitetinin 1999-cu ildə pediatriya ixtisası ilə təməli qoyulan, 2007-ci ildə tibbi profilaktika və 2011-ci ildə müalicə işi ixtisasları ilə formalaşan tibb fakültəsi ixtisasli elmi-pedaqoji heyətə, fundamental tədris bazasına malikdir. Muxtar respublika rəhbərliyinin səhiyyənin inkişafına, ali təhsilli, yüksək ixtisaslı tibb mütəxəssislərinin hazırlanmasına göstərdiyi yüksək diqqət və qayğının təzahürüdür ki, fakültənin tələbələri təhsil müddətində praktiki vərdişlərə yiyələnmək məqsədilə Naxçıvan Muxtar Respublikasının müasir xəstəxanalarında və Türkiyə Cümhuriyyətinin İzmit Kocaeli, Kayseri Erciyez, Ərzurum Atatürk, Elazığ Fırat, Van Yüzüncü İl, Ankara universitetlərinin tibb fakültələrinin klinik xəstəxanalarında peşə təcrübələri keçirlər.

Tibb fakültəsinin 44 nəfər yuxarı kurs tələbəsi bu il də Türkiyə Cümhuriyyətinin Ərzincan, Qars Qafqaz, Erciyez universitetlərində təcrübədə oldular. Tələbələri fakültənin dekanı, dosent Bəhruz Məmmədov, ümumi təbabət kafedrasının müdiri, dosent Malikəjdər İbrahimov, müəllimlərdən Azərbaycan Respublikasının əməkdar müəllimi Kubra Cəfərova, Azərbaycan Respublikasının əməkdar həkimi, tibb elmləri üzrə fəlsəfə doktoru Cəbi İsmayılov, tibb elməri üzrə fəlsəfə doktorları - Naxçıvan MR-in əməkdar həkimi, dosent İsa Abdullayev və Elmar Rzayev,  təməl tibb fənləri kafedrasının dosenti Elsevər Əsədov, həkimlərdən Malik Əliyev, Mətləb İbrahimov, Əzizə Hüseynova müşayiət etmişlər. 

Ərzincan Universitetində heyəti prorektor, eyni zamanda tibb fakültəsinin dekanı, professor Fəhmi Çələbi qarşılayaraq iki universitet arasında imzalanan anlaşma memorandumuna əsasən ikitərəfli iş birliyinin, qarşılıqlı əməkdaşlığın daha da inkişaf edəcəyindən danışdı. Şərqi Anadoluda yerləşən Ərzincan vilayəti və buradakı universitet haqqında məlumat verildi. Bildirildi ki, 1976-cı ildə Ərzincan Məslək Yüksəkokulu kimi fəaliyyətə başlayan, 2006-cı ildən müstəqil universitet olan bu ali məktəb Anadoluda dünya universiteti kimi formalaşıb inkişaf etməkdədir. Sonra xəstəxana ilə ümumi tanışlıq oldu. Elmi-tədqiqat institutu rolu oynayan, bir il öncə istifadəyə verilən 250 çarpayılıq xəstəxanada 21 poliklinika şöbəsi, 10 əməliyyat otağı, 1 anjoqrafiya otağı, 20-dən çox hemodializ aparatının olduğu dializ şöbəsi, təcili tibbi yardım şöbəsi, laboratoriya var.

Təcrübəçi tələbələr təcili tibbi yardım şöbəsində Arif Onur Eden və Murad Aydının köməkliyi ilə yol qəzası zamanı və istehsalatda ağır xəsarət alan, kardioloji şoka düşən xəstələrə ilk tibbi yardım göstərdilər. Ümumi cərrahiyyə şöbəsində peşəkar cərrahlar Kamal Peker və Abdullah İnalın  rəhbərliyi ilə cərrahiyyə əməliyyatlarında oldular, tənəffüs yolları, qastroenteroloji, uroloji, fəqərə və qasıq yırtıqları kimi xəstəliklərin cərrahi müdaxilə yolu ilə müalicəsində iştirak etdilər. Daxili xəstəliklər şöbəsində Levent Dəmirdaş, Aysu Özbiçər daxili sekresiya vəziləri xəstəlikləri və digər xəstəliklər haqqında tələbələri əyani olaraq məlumatlandırdılar. Ginekologiya şöbəsində Paşa Uluğ və Yaprak Asmanın köməkliyi ilə tələbələr ginekoloji xəstəliklərin, sonsuzluq və hamiləliyin pozulmasının səbəblərini araşdırdılar.

Qastroenterologiya şöbəsində Onur Çingiz və Funda Uğur Kantarın köməkliyi ilə endoskopiya və kolonoskopiya yolu ilə həzm sistemi xəstəliklərinin aşkarlanmasında iştirak etdilər. Tələbələr ağciyər xəstəlikləri şöbəsində Ədhəm Ənvərdən tənəffüs yolları xəstəliklərinin, ortopediya şöbəsində Əhməd İssından oynaqlarda və bazu sümüklərində sınıq və çıxıqlar, revmatizm kimi xəstəliklərin, kardioloq Mutlu Böyüklüdən ürək-damar xəstəliklərinin, urologiya şöbəsində Əli Səid Bozqurddan böyrək və sidik yolları xəstəliklərinin diaqnoz və müalicəsi ilə bağlı son elmi yenilikləri öyrəndilər.

Təcrübə müddətində xəstəxanada çalışan tanınmış professorlar tələbələrə nəzəri məşğələlər də keçdilər. Universitetin rektoru, professor, endokrinoloq İlyas Çapoğlu "Şəkərli diabetin üzə çıxarılması, müşahidə və müalicəsi", professor doktor, cərrah Fəhmi Çələbi "Kəskin qarın ağrıları", ortoped Abdullah Bilgə "Ortopedik xəstəliklərin müalicə üsulları", pulmonoloq Ədhəm Ənvər "Tənəffüs yolları xəstəliklərinin düzgün diaqnozu və müalicəsi", Arif Onur Eden "İlk təcili tibbi yardım", ginekoloq Paşa Uluğ "Ginekoloji xəstəliklərin aşkarlanması" mövzularında məruzələr oxudular.

Səfər zamanı Ərzincan şəhərindəki Ekşisu istirahət parkına, Qara dəniz və dağlar arasında  yerləşən  Trabzon şəhərinə, Qara dəniz sahilinə ekskursiyalar da təşkil olundu. Trabzonda, şəhər mərkəzindən 8 km aralıda, Soyuqsu təpəsində yerləşən, gülzarlıq və bağ-bağatla əhatə olunmuş Atatürk köşk muzeyi xüsusi maraq doğurdu. Avropa və Qərb intibah memarlığının gözəl nümunələrindən olan 4 mərtəbəli bu bina 1890-1903-cü illərdə inşa olunmuşdur. Köşkün ziyarətçilərini Mustafa Kamal Atatürkün həyətdəki büstü qarşılayır.

Təcrübənin son günü keçirilən görüşdə xəstəxananın baş həkimi, tanınmış cərrah İsmayıl Yılmaz naxçıvanlı müəllim və tələbələrə gələcək fəaliyyətlərində uğurlar arzuladı. Naxçıvan Dövlət Universitetinin müəllimi, tibb elmləri üzrə fəlsəfə doktoru Elmar Rzayev səmimi qarşılanma və yaradılan şərait üçün universitet və xəstəxana rəhbərliyinə, kollektivə minnətdarığını bildirdi. Sonda sertifikatlar təqdim olundu.

Tibb fakültəsinin tələbələrinin bir qismi isə Türkiyənin Qars Qafqaz Universitetinin əsaslı şəkildə yenidən qurulmuş xəstəxanasında oldular. Tibb fakültəsinin dekanı, professor Bünyamin Ünal, xəstəxananın baş həkimi, dosent, cərrah Miktat Kaya fakültə və xəstəxana haqqında ətraflı məlumat verdi. Tələbələr xəstəxananın təcili tibbi yardım, cərrahiyyə, nevrologiya, urologiya, psixiatriya, ginekologiya, daxili xəstəliklər şöbələrində ultrasəs müayinəsi, rentgen-tomoqrafiya və digər müasir üsullarla xəstələrin müayinəsi, düzgün diaqnoz qoyulması və müalicəsi ilə məşğul oldular. Tələbələrə mulyajlar üzərində praktiki dərslər də keçildi. Təcrübə müddətində cərrah, dosent Yusif Günerhan, Gülşən Çığşar və digər tanınmış həkimlər tibbin aktual problemlərinə həsr olunmuş mühazirələr oxudular.

Naxçıvan Dövlət Universitetinin müəllim və tələbələri Azərbaycan xalqının ümummilli lideri, türk dünyasının böyük öndərlərindən olan Heydər Əliyevin Qars şəhərindəki abidəsini ziyarət etdilər. Heyət Qars Qafqaz Universitetində Naxçıvan Dövlət Universitetinin rektoru, akademik İsa Həbibbəylinin də böyük əməyi və dəstəyi sayəsində yaradılmış Heydər Əliyev Tədris Mərkəzində oldu, burada dünyaşöhrətli siyasi xadimin həyat və fəaliyyəti ilə bağlı materiallarla tanışlıq oldu.

Türkiyənin mədəni dəyərlərini özündə yaşadan bölgələrindən biri olan  Qarsdakı tarix-diyarşünaslıq muzeyinə, Qars Qalası və Ani qalasına ekskursiyalar da təşkil olunmuşdur.

Təcrübənin sonunda keçirilən görüşdə  hər iki universitetin tibb fakültələrinin dekanları, professor Bünyamin Ünal və dosent Bəhruz Məmmədov belə qarşılıqlı əməkdaşlığın, təcrübə mübadilələrinin tələbələr üçün əhəmiyyətindən danışdılar, müəllim və tələbələrə sertifikatlar təqdim olundu.

Kayseri şəhərindəki Erciyez Universitetinin rektoru, professor-doktor Fəxrəddin Keleştemur, tibb fakültəsinin dekanı, professor-doktor Məhəmməd Güvən, xəstəxananın baş həkimi, professor-doktor Qudrət Doğru da Naxçıvandan gələn heyəti yüksək qonaqpərvərliklə, hərarətlə qarşıladılar.

Qeyd olundu ki, Erciyez Universiteti 1978-ci ildə Kayseri Universiteti adı ilə fəaliyyətə başlamış, 1982-ci ildən Erciyez dağının adı ilə adlandırılmışdır. Türkiyənin 10 ən tanınmış universitetindən biri olan bu ali məktəbin təməlini təşkil edən fakültələrdən biri də hələ 1969-cu ildə Hacəttəpə Universiteti nəzdində açılan, 1982-ci ildən Erciyez Universitetinə birləşdirilən tibb fakültəsidir.

Fakültə dekanı, professor-doktor Məhəmməd Güvən və baş həkim, professor-doktor Qudrət Doğrunun təşkilatçılığı və qayğısı ilə uşaq xəstəxanasında, cərrahiyyə, daxili xəstəliklər, endokrinologiya, ağciyər xəstəlikləri, hemotologiya, onkologiya, təcili tibbi yardım, doğum şöbələrində müxtəlif xəstəliklərin müayinəsində fəal iştirak edən gələcək həkimlərimiz müasir müalicə üsullarını, ən yeni tibbi texnologiyadan istifadəni öyrəndilər.

Təcrübənin sonunda rektor, professor-doktor Fəxrəddin Keleştemurun, fakültə dekanı və xəstəxananın baş həkiminin iştirakı ilə keçirilən tədbirdə təməl tibb fənləri kafedrasının dosenti Elsevər Əsədov çıxış edərək yüksək qonaqpərvərlik və səmimi münasibət üçün minnətdarlıq etdi. Müəllim və tələbələrimizə sertifikatlar təqdim olundu.  

Mehriban SULTAN,
NDU-nun Mətbuat şöbəsinin müdiri

 
 
 
Səhifənin başına qalx "Xəbərlər" bölməsinə get Nömrənin müdəricatına dön

Səhifənin başına qalx

 
 

 
 
 
 
 
 
 

 
 

İnternet və ya sayt daxilində  axtarmaq istədiyiniz sözü xanaya yazıb "Axtar" düyməsini sıxın

internetdə

saytda

 
 

AZƏRBAYCAN
RESPUBLİKASI
TƏHSİL
QANUNU

ƏN YAXŞI
MÜƏLLİMLƏR

ƏN YAXŞI
MƏKTƏBLƏR

700 BAL
TOPLAYANLAR

 
Heydər Əliyev
İlham Əliyev
Heydər Əliyev Fondu

Təhsil Nazirliyi

 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

ELANLAR

       
 

Copyright  ©  All Rights Reserved.
Created and supported by Mehman Shafagatov