Avqustun 20-də Azərbaycan Milli Elmlər Akademiyasının (AMEA) İnsan Hüquqları İnstitutunda bioetika üzrə mütəxəssislər və müəllimlər üçün treninq-seminar başlamışdır.

Treninq-seminar YUNESKO-nun baş ofisi, qurumun Azərbaycan üzrə Milli Komissiyası və AMEA-nın İnsan Hüquqları İnstitutu tərəfindən təşkil olunmuşdur.

AzərTAc xəbər verir ki, treninq-seminarın açılışında çıxış edən AMEA-nın İnsan Hüquqları İnstitutunun direktoru, Milli Məclisin deputatı Aytən Mustafayeva Azərbaycan Prezidenti İlham Əliyevin ölkəmizdə elmin, təhsilin inkişafına böyük diqqət yetirdiyini söyləmişdir.

A.Mustafayeva bildirmişdir ki, bioetika və insan hüquqları sahəsi bir çox ölkələrdə olduğu kimi, Azərbaycanda da inkişaf edir. Son vaxtlar bu sahə ilə bağlı ölkəmizdə səmərəli tədbirlər reallaşdırılmışdır. Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban Əliyevanın təşəbbüsü ilə ötən il qurumun Beynəlxalq Bioetika Komitəsinin 18-ci sessiyası Bakıda keçirilmişdir.

Qeyd edilmişdir ki, bu sahə AMEA-nın İnsan Hüquqları İnstitutunun fəaliyyətində də prioritetdir. İnstitutun təşəbbüsü və təşkilatçılığı ilə bu yaxınlarda YUNESKO-nun "Bioetika" baza tədris proqramı Azərbaycan dilinə tərcümə edilərək nəşr olunmuş, ali məktəblərin tədris planına salınmışdır. Tədbirdə bioetika üzrə təhsilin əhəmiyyəti də qeyd edilmişdir.

AMEA-nın İnsan Hüquqları İnstitutunun direktor müavini, YUNESKO-nun bioetika üzrə kafedrasının Azərbaycan bürosunun rəhbəri Vüqar Məmmədov treninq-seminarın əhəmiyyəti haqqında danışmışdır.

YUNESKO-nun baş ofisinin nümayəndəsi İrakli Xodeli, İsrailin Xayfa Universitetinin professorları Amnon Karmi və Daniella Keydar bioetika və insan hüquqları üzrə qurumun həyata keçirdiyi tədbirlərin əhəmiyyətindən bəhs etmişlər. Qeyd olunmuşdur ki, Azərbaycan bioetikanın regionda inkişafına öz töhfəsini verir və bu istiqamətdə YUNESKO ilə səmərəli əməkdaşlıq edir. YUNESKO rəhbərliyi Azərbaycanın bioetika sahəsindəki nailiyyətlərini hər zaman yüksək qiymətləndirir. Qurumun ilk treninq-seminarı da 2011-ci ilin noyabrında Bakıda keçirilmişdir.

Natiqlər əminliklə qeyd etmişlər ki, treninq-seminar bioetika sahəsində mütəxəssislərin hazırlığı işini daha da yaxşılaşdıracaqdır.

Avqustun 24-də başa çatacaq treninq-seminar bioetikanın tədrisi üzrə təcrübəli ekspertlər - İsrailin Xayfa Universitetinin professorları Amnon Karmi, Daniella Keydar və AMEA-nın İnsan Hüquqları İnstitutunun direktor müavini Vüqar Məmmədov tərəfindən aparılacaqdır.