Bakıdakı 82 nömrəli tam orta məktəbin direktoru Vaqif  Mehdiyevdən aldığımız  məlumata  görə, təhsil ocağında  əsaslı təmir  işləri uğurla davam  etdirilir.  Bakı Şəhər İcra Hakimiyyətinin  sifarişi ilə həyata keçirilən təmir-bərpa işlərinə cari ilin iyunundan başlanılıb. Məktəb binasının dam örtüyü dəyişdirilib, fasad və divarlar üzlük daşla  yenidən işlənib.

Yeni istilik sistemləri quraşdırılıb, elektrik xətləri çəkilib, qapı və pəncərələr dəyişdirilib, sinif otaqları, yeməkxana, kitabxana, laboratoriyalarda təmir işləri müasir standartlara uyğun, yüksək  keyfiyyətlə görülüb və müasir təhsil üçün hər cür şərait yaradılıb.

Sevindirici haldır ki, təhsil ocağında şagirdlərin sağlamlığı və mənalı istirahəti üçün  idman zalı və futbol meydançası yenidən bərpa olunub. Direktor bildirdi ki, binanın girişində  şagirdlərin  təhlükəsizliyini qorumaq üçün gözətçi məntəqəsinin tikilməsi də nəzərdə tutulub. 

Məktəb üçün 25 sinif otağından ibarət üçmərtəbəli korpusun da inşasına  başlanacağını  deyən  Vaqif  müəllim bütün görülən işləri Prezident İlham Əliyevin təhsilə göstərdiyi diqqət və qayğının nəticəsi kimi dəyərləndirdi.