|
Avstriyanın "Gain&sustain" ("Əldə etmək və saxlamaq")
təşkilatının rəhbəri xanım Martina M.Linzer və
təmsilçiləri xanım Sabrina Sifrer, Vyana Universitetinin
müəllimi Xose Antonio Torres Naxçıvan Dövlət
Universitetində olmuşlar.
Rektor, akademik İsa Həbibbəyli qonaqları salamlayaraq
Azərbaycanın ən qədim ərazisi olan, sivilizasiyanın
beşiyi sayılan Naxçıvan, 45 illik tarixi inkişaf yolu
keçmiş Naxçıvan Dövlət Universiteti haqqında ətraflı
məlumat vermişdir. Avstriya ilə Azərbaycan arasında
iqtisadi, siyasi və mədəni əlaqələrin möhkəmlənməsindən,
2012-ci ilin may ayında Naxçıvan Muxtar Respublikası Ali
Məclisinin sədri Vasif Talıbovun Avstriyanın Ştiriya
Federal Əyalətinə işgüzar səfərinin regionlararası
əməkdaşlığın inkişafı baxımından əhəmiyyətindən
danışılmışdır. Qeyd olunmuşdur ki, 2010-cu ildə Naxçıvan
Dövlət Universiteti ilə Qrats Karl Frantsenes
Universiteti arasında imzalanmış əməkdaşlıq memorandumu
ali məktəblərin gələcək ikitərəfli əlaqələrinə geniş
imkanlar açacaq.
Xanım Martina M.Linzer səmimi qarşılanma üçün
universitet rəhbərliyinə minnətdarlığını bildirmiş,
təmsil etdiyi təşkilat haqqında məlumat vermişdir.
Bildirilmişdir ki, 2009-cu ildə Avstriyada yaradılan
"Gain&sustain" təşkilatı gənclərin Avropa, eləcə də
dünya ölkələrinin sosial-iqtisadi, ekoloji, mədəni
inkişafında birgə iştirakını təmin etmək məqsədi
daşıyır. Məlumat verilmişdir ki, Avropa Birliyi
tərəfindən maliyyələşdirilən təşkilat Avropada və
Qafqazda müxtəlif sahələr üzrə uğurlu layihələr həyata
keçirir. Naxçıvan Dövlət Universitetinin timsalında
Azərbaycanın da bu layihələrdə uğurla təmsil olunması
mühüm əhəmiyyət kəsb edir.
Üçgünlük səfər çərçivəsində keçirilən görüşlərdə
universitetin iştirakı nəzərdə tutulan dörd layihənın
təqdimat mərasimi keçirilmişdir. Layihələrdən
ölkələrarası siyasi münasibətlərin inkişafına xidmət
edəcək "Qafqaz və Avropa Birliyi təhlükəsizliyi və media
əlaqələri", qış turizmi və bələdiyyə istiqamətini əhatə
edəcək "Gənclər fəaliyyətdə", tələbə mübadiləsi, sosial
sahibkarlıq və innovasiyaların inkişafı ilə bağlı
"Sosial sahibkarlıq və birgə iş", "Çərçivə" proqramı
çərçivəsində enerjinin səmərəliliyinə, memarlığın
inkişafına yönəldilən "Cəmiyyətdə elm" adlı layihələr
maraq doğurmuşdur. Layihələrlə bağlı təşkilati məsələlər
müzakirə olunmuş, məsul şəxslər və işçi heyət
müəyyənləşdirilmişdir. Tərəflər qarşılıqlı əlaqələrin
geniş imkanlara malik olduğunu vurğulamışlar.
Mehriban SULTAN,
NDU-nun Mətbuat şöbəsinin müdiri |
