Ölkədə əsası ümummilli lider Heydər Əliyev tərəfindən
qoyulmuş siyasi və iqtisadi kurs Azərbaycan
Respublikasının Prezidenti İlham Əliyev tərəfindən
uğurla davam etdirilir, müxtəlif sahələrdə, o cümlədən
təhsil sahəsində islahatlar mərhələ-mərhələ həyata
keçirilir. Son illərdə ölkəmizin iqtisadiyyatının
dinamik inkişafı təhsilin inkişafı üçün də əlverişli
şərait yaratmış, Azərbaycan təhsili özünün yeni inkişaf
dövrünə qədəm qoymuşdur. Ölkəmizin gələcək inkişaf
modelini formalaşdıran əsas amil kimi təhsilin inkişafı
daha da sürətlənmiş, insan kapitalının formalaşmasına
xidmət edən ən mühüm sahə olmuşdur.
Prezident İlham Əliyevin gündəlik diqqəti və qayğısı
sayəsində təhsilin ayrı-ayrı sahələri üzrə 16
inkişafyönümlü dövlət proqramı təsdiq olunmuş və uğurla
həyata keçirilməkdədir. Bu proqramların reallaşması
nəticəsində təhsilin infrastrukturu müasir tələblərə
uyğun qurulur, təhsilin məzmunu yeniləşir, yeni
dərsliklər yazılır, təhsil alanların biliyinin
qiymətləndirilməsində yeni model və mexanizmlər tətbiq,
təhsil müəssisələri informasiya-kommunikasiya
texnologiyaları ilə təmin edilir, təhsil sistemi
informasiyalaşdırılır, istedadlı uşaqların aşkara
çıxarılması və inkişafı üçün zəruri tədbirlər görülür.
Xüsusi qayğıya ehtiyacı olan uşaqlar dövlət qayğısı ilə
əhatə olunur, texniki peşə və ali təhsil, xaricdə təhsil
və digər bu kimi sahələrdə əhəmiyyətli nailiyyətlər əldə
olunur. Son 9 il ərzində 2200-dən çox yeni məktəb binası
tikilmiş, xeyli məktəb əsaslı təmir edilmiş və
məktəblərin maddi-texniki bazası möhkəmləndirilmişdir.
2008-2012-ci illəri əhatə edən "Təhsil sisteminin
informasiyalaşdırılması üzrə Dövlət Proqramı"nda nəzərdə
tutulan təhsil sisteminin bütün pillələrinin şəbəkə
strukturunun inkişafı və sürətli İnternetlə təmin
olunması, məlumat və resurs mərkəzləri şəbəkəsinin
yaradılması, müəllimlərə İKT-dən istifadə bacarıqlarının
aşılanması, bütün fənlər üzrə elektron elmi-metodik
vəsaitlərin yaradılması istiqamətində xeyli iş
görülmüşdür. İndi məktəblərdə Azərbaycan tarixi, kimya,
fizika və biologiya dərsləri elektron dərsliklərlə
tədris olunur.
"Kurikulum islahatı üzrə icra planı"nda nəzərdə tutulan
tədbirlər ardıcıllıqla həyata keçirilmiş, fənn
kurikulumları hazırlanmışdır. Fənn kurikulumlarının
tətbiq edildiyi siniflər üçün yeni dərsliklər
hazırlanmış, müəllimlər üçün vəsait, şagirdlər üçün iş
dəftərləri çap edilmişdir.
Müasir fənn kurikulumlarının tətbiqinə başlandıqdan
sonra öyrətmə və öyrənmə prosesinə münasibət
dəyişmişdir. Şagirdlər fəallaşmışdır. Düşünməyə, axtarış
aparmağa, sərbəst mülahizə yürütməyə, əməkdaşlıq etməyə,
müstəqil şəkildə problemi həll etməyə daha çox sövq
olunurlar. Eyni zamanda müəllimlərin hər bir dərsə
yaradıcı münasibəti artmış, məzmuna görə optimal forma,
üsul və metod axtarışı ön plana çıxmışdır. Fənn
proqramlarında məzmun elə müəyyənləşdirilib ki, sinifdə
səmərəli təhsil əməkdaşlığı, şagirdlər üçün maraqlı dərs
formalarından, üsullarından, interaktiv metod və
vasitələrdən yerli-yerində istifadə etmədən qarşıya
qoyulan məqsədləri reallaşdırmaq mümkün deyildir.
Yeni məzmun standartları gündəlik qiymətləndirmədən
məktəbdaxili qiymətləndirməyə keçməyi zəruri etmişdir.
Buraxılış imtahanlarının mərkəzləşmiş qaydada aparılması
təhsilin keyfiyyətinin yüksəlməsinə, şagirdlərin,
müəllimlərin, valideynlərin məsuliyyətinin artmasına
xidmət edir.
19 iyun 2009-cu ildə təsdiq edilən "Təhsil haqqında"
Azərbaycan Respublikasının qanunu təhsil işçiləri üçün
dövlət qarşısında öz məsuliyyətini dərk edən, xalqın
milli ənənələrinə və demokratiya prinsiplərinə, insan
hüquqları və azadlıqlarına hörmət edən, vətənpərvərlik
və azərbaycançılıq ideyalarına sadiq olan, müstəqil və
yaradıcı düşünən vətəndaş və şəxsiyyət yetişdirmək
vəzifəsi müəyyənləşdirmişdir.
Rəhbərlik etdiyim məktəbin pedaqoji kollektivi həmin
vəzifələri uğurla yerinə yetirmək, ölkədə aparılan
təhsil islahatlarına öz töhfəsini vermək üçün hazırda
bütün imkanlarından istifadə edir.
Yeri gəlmişkən bildirim ki, məktəbimiz fəaliyyət
göstərdiyi illər ərzində, bir qayda olaraq, rayonda
qabaqcıl təhsil ocaqlarından olmuşdur. Məktəblərarası
metodmərkəz olmaqla qabaqcıl təcrübəni, təhsil sahəsində
olan yeniliklərin planlı öyrənilməsində müəllimlərə öz
köməyini göstərmişdir. 1993-1994-cü tədris ilindən
məktəbimiz öz fəaliyyətini Sumqayıt şəhərində davam
etdirir. Son illərdə ölkədə məktəblərin maddi-texniki
bazasının möhkəmləndirilməsi, məktəblərin tikintisi və
təmiri sahəsində aparılan işlər məktəbimizdən də yan
keçməmiş, 6 sinif otağından ibarət təhsil ocağımız tam
təmir olunmuşdur.
Məktəbdə 22 nəfər müəllim təlim və tərbiyə işi aparır.
Onlardan 18 nəfəri ali təhsillidir. Gənc müəllimlər
sayca çoxluq təşkil edir. Sabit şagird kontingenti var,
məktəbdən yayınma, dərs buraxma halları yoxdur. Müntəzəm
olaraq sinif rəhbərləri valideyn assosiasiyası ilə birgə
iş aparır, həlli vacib məsələləri həll edirlər.
Yeni fənn kurikulumlarının tətbiqi ilə bağlı 4 ibtidai
sinif müəllimi və eləcə də V sinifdə dərs aparacaq 9
fənn müəllimi, təlim kurslarından keçmiş, sertifikatlar
almışlar. Müəllimlərimiz fəal dərs metodlarından
istifadə edir; müstəqil düşünmə və işləmə xarakterli
test tapşırıqlarını şagirdlərə öyrətməyə çalışırlar.
Təlimin maddi bazası zənginləşib. Heydər Əliyev Fondu
hesabına fənlər üzrə əyani vasitələr, xəritələr,
məktəbli ensiklopediyaları çap olunaraq tədris
ocaqlarına, o cümlədən bizim məktəbə verilmişdir.
Mərkəzləşmiş buraxılış imtahanlarının nəticələrinə görə
2010-2011-ci tədris ilində məktəbimiz rayon məktəbləri
arasında fərqləndiyinə görə təhsil söbəsi tərəfindən
təltif olunmuşuq. Həmin tədris ilində məktəbin XI
sinfini 9 nəfər bitirmiş, onlardan 5 nəfəri dövlət ali
məktəblərinə, 2 nəfər özəl ali məktəbə qəbul olmuşlar.
Şagirdlərimiz rayon olimpiadasında fəallıq göstərərək
uğurlu nəticələr qazanmışlar.
Məktəbimizdə məktəbdənkənar və sinifdənxaric işlərin
vahid sistemi yaradılmış, bu sahədə ardıcıl işlər
aparılır. Tərtib olunmuş tədbirlər planı vaxtında
yerinə yetirilir. Tərbiyə və təlimin sıx vəhdətdə
aparılması müvəffəqiyyətimizi artırır.
Fənn dərnəklərinin imkanlarından maksimum istifadə
edirik. Şagirdlərin hərtərəfli inkişafına kömək edən,
mühazirə, məruzə, ekskursiya, fənn gecələrinin təşkili
və keçirilməsi, ilk mənbələr üzərində çalışmalar öz
müsbət təsirini göstərir.
Rayon və respublika müsabiqələrində məktəbimizin
uğurları daim artır. IX sinif şagirdi Ayşən Paşayeva
ötən illərdə qalib olmuş, 2011-ci ilin oktyabr ayında
"Müstəqilliyimiz milli qürurumuzdur" mövzusunda
keçirilmiş inşa yazı müsabiqəsində fərqləndiyinə görə
Laçın Rayon Təhsil Şöbəsinin I dərəcəli diplomu ilə
təltif olunmuşdur. Aprel ayında ulu öndərimiz Heydər
Əliyevin anadan olmasının 89-cu ildönümünə həsr olunmuş
inşa müsabiqəsində onun inşası "Heydər Əliyev
şagirdlərin gözü ilə" kitabına daxil edilmişdir.
XI sinif şagirdi Səbinə Məhərrəmli "Şəhidlər ölməzdir"
mövzusunda məktəblilər arasında keçirilən inşa yazı
müsabiqəsində I yerə layiq görülmüş, diplom və qiymətli
hədiyyələrlə mükafatlandırılmışdır. M.Ə.Sabirin anadan
olmasının 150 illiyi ilə əlaqədar keçirilən respublika
inşa yazı müsabiqəsində tərifnamə ilə təltif olunmuşdur.
VIII sinif şagirdi Minarə Abbaslı ulu öndərimiz Heydər
Əliyevin anadan olmasının 89-cu ildönümünə həsr edilmiş
"Yolumuz Heydər yoludur! Bu yol Vətənə doğrudur!" bədii
qiraət ifaçılığı üzrə rayon müsabiqəsində II yeri
tutmuşdur.
X sinif şagirdi Ayşən Əlizadə həmin mövzuda rəsm
müsabiqəsində III yerə layiq görülmüşdür. IX sinif
şagirdi Aysu Əkbərova "Sultan bəy" portreti ilə rayon
müsabiqəsində I yerə layiq görülmüşdür. Onun çəkdiyi
portret hazırda rayon mədəniyyət və turizm şöbəsinin
qalereyasında saxlanılır. O, habelə Heydər Əliyevin
anadan olmasının 89-cu ildönümünə həsr olunmuş "Yolumuz
Heydər yoludur! Bu yol Vətənə doğrudur!" adlı rəsm üzrə
rayon müsabiqəsində I yerə layiq görülmüş, diplom və
qiymətli hədiyyələrlə mükafatlandırılmışdır.
IX sinif şagirdi Sadiq Murtuzayevin xalq qəhrəmanı
Sultan bəyin anadan olmasının 140 illiyi ilə əlaqədar
rayon məktəbliləri arasında keçirilən inşa müsabiqəsində
"Zabux döyüşü ermənilərə tutarlı cavabdır" mövzusunda
yazdığı inşa yüksək qiymətləndirilmiş, rayon icra
hakimiyyətində təhsil şöbəsinin II dərəcəli diplomu ilə
təltif olunmuşdur.
İdman sahəsində də şagirdlərimizin uğurları az
olmamışdır. X sinif şagirdi Orxan Sadıxov respublika və
respublikadankənar bir sıra yarışlarda qüvvəsini
sınamış, sərbəst güləş üzrə Avropa çempionatında iştirak
etmək hüququ qazanmışdır.
Hazırda yeni dərs ilinin astanasındayıq. Yeni dərs
ilinə hazırlıqla bağlı bütün zəruri işləri görmüşük.
Məktəbimizdə cari təmir işləri aparılıb, vəsait və
dərsliklər, jurnallar gətirilib, I sinfin siyahılaşması
başa çatdırılıb. İnanırıq ki, yeni tədris ilində
uğurlarımız daha çox olacaq.
Tapdıq ABBASOV,
Laçın rayonu, Rizvan Hümbətov adına
Güləbird kənd tam orta məktəbinin direktoru |