Xüsusi qayğıya ehtiyacı olan bir qrup azərbaycanlı uşaq Heydər Əliyev Fondunun dəstəyi ilə sentyabrın 1-də Gürcüstana səfərə gəlmişdir.

Uşaqlar üçün bu xeyriyyə aksiyası Azərbaycanın birinci xanımı, Heydər Əliyev Fondunun prezidenti Mehriban Əliyevanın və Gürcüstanın birinci xanımı Sandra Elizabet Rulofsun təşəbbüsü ilə artıq ikinci ildir ki, həyata keçirilir.

Azərbaycanlı uşaqlar və onları müşayiət edən şəxslər 10 gün Gürcüstanda səfərdə olacaqlar. Qeyd edək ki, bu səfərlər qarşılıqlıdır. Gürcüstandan da 16 nəfərlik nümayəndə heyəti bu müddət ərzində Azərbaycanda qonaq olacaqdır.

Azərbaycan nümayəndə heyətinin üzvü, Bakı şəhərinin Nizami rayonundakı 1 nömrəli uşaq evinin müəllimi Rövşən Məmmədov AzərTAc-ın müxbiri ilə söhbət zamanı vurğulamışdır ki, Azərbaycanda uşaqlara, əsasən də xüsusi qayğıya ehtiyacı olan uşaqlara daim diqqət və qayğı göstərilir. Azərbaycanın birinci xanımı Mehriban Əliyeva bu işə böyük önəm verir və Gürcüstana səfərimiz də məhz onun rəhbərlik etdiyi Heydər Əliyev Fondunun dəstəyi ilə təşkil olunmuşdur. Biz bu qayğı və diqqətə görə Mehriban xanıma minnətdarlığımızı bildiririk.

R.Məmmədov bildirmişdir ki, səfər çərçivəsində müxtəlif maraqlı görüşlər keçiriləcək, azərbaycanlı uşaqlar Gürcüstanın tarixi yerləri, muzeyləri, ayrı-ayrı şəhərləri ilə tanış olacaqlar.