Türkiyə Respublikasının Anadolu və İqdır universitetlərinin nümayəndə heyəti Naxçıvan Dövlət Universitetində oldu.

Azərbaycan xalqının ümummilli lideri Heydər Əliyevin Naxçıvan şəhərindəki abidəsini ziyarət etməklə başlanan səfər universitet kollektivi ilə keçirilən görüşlə davam etdirildi. Görüş zamanı rektor, akademik İsa Həbibbəyli qonaqları salamlayaraq Azərbaycan və Türkiyə arasındakı çox qədim tarixi köklərə malik dostluğun və birliyin bu gün də uğurla davam etdirilməsindən danışdı. Rektor 45 illik tarixə malik Naxçıvan Dövlət Universitetinin inkişaf yolu, strukturu, professor-müəllim heyəti və tələbə kontingenti haqqında məlumat verdi. Qeyd olundu ki, dünyanın 70-ə yaxın ölkəsinin tanınmış ali məktəbləri ilə  beynəlxalq əlaqəyə malik  NDU Türkiyənin Ankara, Ərdahan, Van Yüzüncü İl, Kocaeli, Qars Qafqaz, Elazığ, Ərzincan  universitetləri ilə dayanıqlı elmi əməkdaşlığa malikdir.  Rektor İqdır və Anadolu universitetləri ilə də əməkdaşlığın inkişafının əhəmiyyətindən bəhs etdi. Anadolu Universitetinin distant təhsil, informasiya-kommunikasiya texnologiyalarının tətbiqi sahəsindəki zəngin təcrübəsindən faydalanmağın zəruri olduğu vurğulandı.

İqdır Universitetinin rektoru, professor İbrahim Hakkı Yılmaz, Anadolu Universitetinin prorektoru, professor Aydın Ziya Özgür ikitərəfli iş birliyinin ölkələr və xalqlar arasında münasibətlərin daha da möhkəmlənməsi, elm və təhsilin inkişafı, dünya təhsil sisteminə inteqrasiya baxımından əhəmiyyətindən danışdılar.   

Görüş zamanı virtual əlaqələrin inkişafı, videokonfrans və simpoziumların, elmi təcrübə mübadilələrinin, müştərək mədəniyyət, idman tədbirlərinin təşkili məsələləri müzakirə olundu. Türkiyədən gələn heyət universitet ərazisini gəzdi, Heydər Əliyev Universiteti, Tələbə evi, Sosial Xidmət  Mərkəzində və müxtəlif tədris korpuslarında oldu.  

Mehriban SULTAN,
NDU-nun Mətbuat şöbəsinin müdiri