Ölkəmizin digər regionlarında olduğu kimi Ağcabədidə də
məktəb infrastrukturunun müasirləşdirilməsi
istiqamətində mühüm işlər görülür. Rayon təhsil
şöbəsindən aldığımız məlumata görə, artıq 4 məktəb üçün
yeni bina tikilib başa çatdırılmışdır. Bunlar şəhər 3
nömrəli məktəb-liseyin 960 şagird yerlik, Qaraxanlı və
Şərəfxanlı tam orta məktəblərinin hər birinin 180 şagird
yerlik, Aran kənd 2 nömrəli ümumi orta məktəbinin 80
yerlik binalarıdır. Bu təhsil ocaqları, habelə binası
əsaslı şəkildə təmir olunmuş şəhər 4 nömrəli tam orta
məktəb sentyabrın 15-də müəllim və şagirdlərin
istifadəsinə veriləcək.
Aran kənd 1 nömrəli tam orta məktəbi üçün 220, Mehrablı
kənd 2 nömrəli ümumi orta məktəbi üçün 80, Qiyaməddinli
kənd tam orta məktəbi üçün 260, Ağabəyli kənd ümumi orta
məktəbi üçün 80, Rəncbərlər kənd tam orta məktəbi üçün
480, Təzəkənd kənd tam orta məktəbi üçün 540, Qaravəlli
kənd tam orta məktəbi üçün 180, Avşar kənd 3 nömrəli
ümumi orta məktəbi üçün 320 şagird yerlik yeni binaların
tikintisi isə hazırda davam etdirilir.
Xatırladaq ki, son illərdə rayonda 8 min 180 şagird
yerlik 29 yeni məktəb binası tikilib istifadəyə verilib.
Bunlardan 6-sı Heydər Əliyev Fondunun "Yeniləşən
Azərbaycana yeni məktəb" layihəsi çərçivəsində, 13-ü
müvafiq Dövlət Proqramına əsasən, 10-u isə qeyri-hökumət
təşkilatlarının xətti ilə inşa olunub. |