Ölkə
Prezidentinin rəhbərliyi ilə hər bir sahədə olduğu kimi,
təhsil sahəsində də uğurlu və sürətli islahatlar gedir.
Təsadüfi deyildir ki, respublikamızın bütün bölgələrində
müasir tələblərə cavab verən, memarlıq baxımından
gözoxşayan yeni məktəb binaları inşa edilir.
Qazax Rayon Təhsil Şöbəsindən aldığımız məlumatda
bildirilir ki, rayonda son illər uğurla aparılan məktəb
tikintisi hesabına yeni məktəblərin sayı durmadan artır.
Hazırda Qazax Rayon İcra Hakimiyyətinin sifarişi ilə 5
yeni məktəb binası tikilir. Şəhər 4 nömrəli tam orta
məktəbin 360, Aslanbəyli kənd tam orta məktəbin 480,
Canallı kənd tam orta məktəbin 220, Qazaxbəyli kənd tam
orta məktəbinin isə 180 şagird yerlik binası inşa
olunur. Qazax şəhər ümumi orta məktəbi isə əsaslı təmir
olunmuş, əlavə olaraq 80 şagird yeri olan sinif
otaqları tikilmişdir. Yeni tikilən məktəb binalarının
hər birində işıqlı, geniş, müasir tələblərə tam cavab
verən kitabxana, fizika və kimya laboratoriyaları,
kompüter otaqları, idman və akt zalı nəzərdə
tutulmuşdur.
Məktəb binalarının 15 sentyabr "Bilik günü"nə kimi
istifadəyə verilməsi nəzərdə tutulmuşdur.
Bundan başqa Azərbaycan Respublikası Nazirlər
Kabinetinin 24-5 nömrəli Sərəncamına əsasən 2012-ci ilin
avqust ayından başlayaraq rayonda Çaylı kənd 2 nömrəli
tam orta məktəbin 640, Daş Salahlı kənd 2 nömrəli tam
orta məktəbin 640, Ürkməzli kənd tam orta məktəbin 220,
Xanlıqlar kənd ümumi orta məktəbinin 180 şagird yerlik
yeni binalarının tikintisinə başlanacaqdır. Xanbağı kənd
tam orta məktəbinin binası isə əsaslı təmir olunacaqdır.
|