Tailandın Pattaya şəhərində keçirilən gənclərin dünya çempionatında yunan-Roma güləşi yarışları Azərbaycan pəhləvanlarının möhtəşəm uğuru ilə yadda qalmışdır.

AzərTAc xəbər verir ki, böyük məşqçi İlqar Abdulov və məşqçi Fuad Əliyevin rəhbərliyi altında Tailanda yollanan yığmamızın üzvlərindən Murad Bazarov (50 kq), Eldəniz Əzizli (55 kq) və Ceyhun Əliyev (66 kq) keçirdikləri bütün görüşləri qələbə ilə başa vuraraq fəxri kürsünün ən yüksək pilləsinə qalxmışlar. Çempionatda 120 kiloqram çəki dərəcəsində mübarizə aparan güləşçimiz Zaur Mehrəliyev isə bürünc medala sahib olmuşdur.

Bu 4 medal, eyni zamanda 9-cu yeri tutan Şamil Ertuqanovun (74 kq) millimizə qazandırdığı 2 xal yığmamızın 40 xalla komanda hesabında birinci yeri tutmasını təmin etmişdir. II-III yerləri isə 38 xalla müvafiq olaraq Rusiya və Türkiyə komandaları bölüşmüşlər.

Son bir ay ərzində Azərbaycan güləşçiləri iştirak etdikləri beynəlxalq yarışlarda öz qələbələri ilə xalqımızı sevindirmişlər. Belə ki, Londonda keçirilən XXX Yay Olimpiya Oyunlarında 2 qızıl, 2 gümüş və 3 bürünc medal qazanan güləşçilərimiz Azərbaycan Olimpiya Hərəkatında yeni bir tarix yazmışlar. Bu uğurun davamı olaraq bir neçə gün əvvəl Bakıda keçirilən yeniyetmələrin dünya çempionatında güləşçilərimiz ümumilikdə 19 medal qazanmışlar ki, bunlardan 9-u qızıl, 5-i gümüş və 5-i bürünc olmuşdur.