Süleymanov Sənan Əmrah oğlu 1996-cı ildə Bakıda ziyalı
ailəsində anadan olub. O, 2006-cı ildən idmanın yunan
- Roma güləş növü ilə məşğul olur. Sənan Bakıdakı 218
nömrəli tam orta məktəbin X sinif şagirdidir. Arzusu
Azərbaycanımızın üçrəngli bayrağını dünya
çempionatlarında və olimpiya oyunlarında zirvələrə
qaldıraraq Dövlət himnimizi möhtəşəm qələbə zəminində
səsləndirməkdir. Bu günlərdə redaksiyamıza dəvət
etdiyimiz Sənan özü haqqında bunları dedi:
-
Uşaq yaşlarımdan məndə idmana böyük həvəs olduğundan
valideynlərimin razılığı ilə "Təhsil" Respublika İdman
Mərkəzinin yunan-Roma güləşi bölməsinə yazıldım.
Müəllimlərimdən Azər Hüseynov və başqalarının zəhməti
hesabına idmanın bu növünün sirlərini öyrənməyə
başladım. İdmana marağım bu sahəyə olan diqqətdən və
idmançılarımızın böyük qələbələrindən sonra yarandı.
Uğurlarım haqqında onu deyə bilərəm ki, 2011-ci ildə
güləş ustası Rəşid Məmmədbəyovun xatirəsinə həsr
olunmuş respublika turnirində 42 kq çəki dərəcəsində I
yerə çıxmışam. 2012-ci il martın 25-də Macarıstanda
keçirilən beynəlxalq turnirdə həmin çəkidə II yeri
tutmuşam. 2012-ci il aprelin 25-dən- 28-dək Bakıda
Azərbaycan Güləş Federasiyasının kuboku uğrunda sərbəst
və yunan-Roma güləşi üzrə yeniyetmə və gənclər arasında
keçirilən beynəlxalq turnirdə 42 kq çəki dərəcəsində I
yeri tutaraq digər yarışlara vəsiqə qazandım. 17-18 may
tarixlərində keçirilən Azərbaycan birinciliyində 42 kq
çəki dərəcəsində rəqiblərimi məğlub edərək I yerə
çıxdım. 17-22 iyul tarixlərində Polşada keçirilən
Avropa birinciliyində III yeri tutaraq dünya
çempionatına vəsiqə qazandım. 21-27 avqust tarixlərində
Bakıda keçirilən dünya birinciliyində III yeri tutaraq
digər yarışlara vəsiqə qazandım. Hazırda yığma
komandanın üzvüyəm. Məşqlərimi də orada davam etdirirəm.
Sənanın şəxsi məşqçisi, "Təhsil" Respublika İdman
Mərkəzinin müəllimi Azər Hüseynov yetirməsi haqqında
fikirlərini bildirərək qeyd etdi ki, onun gələcəyi
parlaqdır. Sənan öz üzərində çalışan, verilən
tapşırıqları hamıdan birinci yerinə yetirən güclü və
nümunəvi idmançılardandır. Arzumuz onu gələcəkdə dünya
və olimpiya çempionu kimi görməkdir. |