Sentyabrın 15-də Azərbaycan Dillər Universitetində
"Bilik günü" münasibətilə rektor, millət vəkili,
professor Səməd Seyidov I kurs tələbələri ilə görüşdü.
ADU-nun akt zalında keçirilən görüş Azərbaycanın Dövlət
himninin səslənməsi ilə başladı. Sonra rektor Səməd
Seyidov "Bilik günü" münasibətilə professor-müəllim
heyətini, tələbələri təbrik etdi. Azərbaycanın təhsil
sistemində özünəməxsus yer tutan Azərbaycan Dillər
Universitetinə daxil olan tələbələrə uğurlar arzuladı.
ADU tələbələrinin Azərbaycanın bayrağını daim uca
tutduğunu, bundan sonra da bu istiqamətdə
çalışacaqlarını dedi. Rektor rəhbərlik etdiyi ali təhsil
ocağında fəaliyyət göstərən fakültə və mərkəzlər
haqqında məlumat verdi. Dövlət başçısı tərəfindən
təhsilə, gəncliyə xüsusi qayğı göstərildiyini deyən
S.Seyidov bildirdi ki, dövlətin təhsilə diqqət və
qayğısı bu sahənin dünya səviyyəsinə yüksəlməsinə imkan
verib. O, ümummilli lider Heydər Əliyevin siyasi
kursunu uğurla davam etdirən dövlət başçısı İlham
Əliyevin təhsilə, təhsil işçilərinə diqqət və
qayğısının, səmərəli fəaliyyət üçün yaratdığı əlverişli
şərait və imkanların ardıcıl və müntəzəm xarakter
daşıdığını vurğuladı.
Rektor Cənubi Qafqazda ən böyük İnformasiya Resurs
Kompleksinin ADU-da fəaliyyət göstərdiyinə və kompleksdə
tələbələrin təhsili üçün bütün şəraitin yaradıldığına
diqqət çəkdi. Yeni tədris ilində ADU-da bir neçə yeni
ixtisasın da açıldığını deyən S.Seyidov ilk dəfə olaraq
universitetdə çinşünaslıq və jurnalistika ixtisası üzrə
tələbə qəbulu həyata keçirildiyini bildirildi. Bu
yaxınlarda universitetdə Çin Mərkəzinin fəaliyyət
göstərəcəyi də bildirildi. Boloniya prosesi haqqında
danışan rektor bir çox tələbələrin öz təhsillərini
xarici ölkələrin ali təhsil müəssisələrində davam
etdirdiklərini nəzərə çatdırdı. Hər bir tələbənin öz
qarşısına məqsəd qoymasının vacibliyindən danışan rektor
bununla yanaşı, əsl vətəndaş olmağın vacibliyini
vurğuladı: "Sizdən bir məsələ tələb olunur: Oxumaq,
təhsil almaq və öz vətəndaş mövqeyinizi ortaya qoymaq.
Təhsil almağın bir çox çətinlikləri var. Bu çətinliyi
dəf edən şəxs gələcəkdə yüksək tribunalardan çıxış
edəcək və onu hər yerdə dinləyəcəklər. Mənəvi dəyərləri
qorumaqla, yüksək savada malik olmaqla işğal altında
qalan Qarabağ torpaqlarını azad edib Azərbaycanın
bayrağını qaldırmalıyıq". Təhsillə elmin yanaşı
addımladığını diqqətə çatdıran rektor S.Seyidov
tələbələri universitetin ictimai həyatında fəal olmağa
çağırdı.
ADU-nun məzunu, Azərbaycan Tələbə Gənclər Təşkilatları
İttifaqının sədri (ATGTİ) Şahin İsmayılov isə çıxışında
universitetdə gənclərə olan diqqət və qayğıdan danışdı
və rəhbərliyə öz təşəkkürünü bildirdi.Qeyd edildi ki,
yeni tədris ilində ən gənc tələbə ADU-da təhsil alacaq.
Universitetin 1 saylı ingilis dili fakültəsinə qəbul
olan Ulduz Salahlının 15 yaşı var.
Sonra 665 balla ADU-nun filologiya fakültəsinə qəbul
olan Sevil Süleymanova çıxış edərək tələbə
yoldaşlarına uğurlar arzuladı və yaradılan şəraitə görə
universitet rəhbərliyinə minnətdarlığını bildirdi.
Valideynlər adından danışan 2 saylı ingilis dili
fakültəsinə 635 balla qəbul olan Səbunə Hüseynovanın
atası Rəfqan Hüseynov isə övladının ADU-ya daxil
olmasından şərəf hissi keçirdiyini dilə gətirdi. Əmin
olduğunu bildirdi ki, gənclər öz təhsillərini başa
vuraraq Azərbaycana layiqli vətədaş kimi xidmət
edəcəklər.
Sonra yüksək balla universitetə daxil olmuş gənclərə
tələbə biletləri və qiymət kitabçaları təqdim edildi.
Şakir CƏFƏROV |