Sentyabrın 15-də ölkəmizin bütün ali, orta ixtisas və ümumtəhsil məktəblərində olduğu kimi, Lənkəran Dövlət Universitetində də yeni dərs ili - "Bilik günü" qeyd edildi.

Universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov yeni dərs ilinin başlanması münasibətilə tələbələri təbrik edərək ali təhsil ocağı haqqında məlumat verdi.

Universitetin dosenti, filologiya elmləri üzrə fəlsəfə doktoru Mirhüseyn Abbas, valideynlər adından Əbdülhüseyn Ağayev  çıxış edərək tələbələri təbrik etdilər, onlara elm və təhsildə uğurlar arzuladılar.

Tələbələr adından çıxış edən, 580-dən çox balla ali məktəbə daxil olmuş Sara Ağayeva, yuxarı kurs tələbələrindən Ülkər Salayeva, Sevinc Şirzadova ürək sözlərini söyləyərək, təhsildə və universitetin ictimai həyatında fəal iştirak edəcəklərinə söz verdilər.

Universitetə yüksək balla daxil olanların bir qrupuna tələbə bileti təqdim edildi.

Sonda universitet bədii özfəaliyyət kollektivinin çıxışı oldu.

Həmin gün universitetdə  birinci kurs tələbələrinin valideynləri ilə də görüş keçirildi. Universitetin rektoru, professor Asəf İsgəndərov valideynləri universitet həyatı ilə tanış etdi və maraqlandıqları suallara cavab verdi.

Tədbirdə rayonun təhsil müəssisələrinin və ictimaiyyətin nümayəndələri iştirak edirdilər.  

Hacı Etibar ƏHƏDOV,
Lənkəran Dövlət Universitetinin Mətbuat və informasiya xidmətinin rəhbəri