Müslüm Maqomayev adına  Azərbaycan Dövlət Filarmoniyasında  Heydər Əliyev Fondunun, Mədəniyyət və Turizm Nazirliyinin  təşkilatçılığı ilə keçirilən  Üzeyir Hacıbəyli IV Beynəlxalq musiqi festivalının  açılış mərasimi olub.  Tədbirdə çıxış edən mədəniyyət və turizm naziri Əbülfəs Qarayev Üzeyir Hacıbəylini Tanrının Azərbaycan  xalqına bəxş etdiyi  misilsiz bir töhfə kimi səciyyələndirib. Bildirib ki, onun yaradıcı irsi  bütün bəşəriyyət üçün  çox dəyərli və mənəvi  sərvətdir. Dahi Üzeyirin əsərləri  dünyanın ən möhtəşəm  teatrlarının səhnələrində tamaşaya qoyulur, ekranlaşdırılır, məşhur müğənnilər tərəfindən  sevilə-sevilə ifa olunur. Çünki onun əsərləri milli olduğu qədər də bəşəridir. Nazir qeyd edib ki, Üzeyir Hacıbəyli  IV Beynəlxalq musiqi festivalında  Rusiya, Türkiyə, ABŞ, Fransa, Almaniya və İtaliyadan gələn dünya şöhrətli  musiqiçilər və kollektivlər  iştirak edirlər.

Festivalın açılış mərasimində  Üzeyir Hacıbəyli adına  Azərbaycan Dövlət Simfonik Orkestrinin ifasında  geniş konsert proqramı  təqdim edilib. Azərbaycan Dövlət  Xor Kapellasının da çıxış etdiyi konsertdə   Ü.Hacıbəylinin "Koroğlu" operasından  uvertüra, III akt və "Şeyx Sənan" operasından fraqmentlər, həmçinin S.Prokofyevin violin və orkestr üçün 2 saylı  konsert səsləndirilib. Festival  sentyabrın 29-dək davam edəcək. 

Sifai SƏFƏROVA