2012-ci ilin sonunadək 17021 təhsil işçisi informasiya-kommunikasiya texnologiyalarının tədris prosesində tətbiqi üzrə təlimlərdən keçəcək. Bu barədə redaksiyamıza "Mədəd Azərbaycan" təşkilatının direktoru Vüsal Xanlarov məlumat verib. Onun sözlərinə görə,  "Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramı (2005-2007-ci illər)" və "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində    indiyədək 110601 təhsil işçisi təlimlərə cəlb olunub ki, bu da pedaqoji kadrların 73 faizini təşkil edir.

V.Xanlarov bildirir ki, təhsil sisteminin pedaqoji heyətinin İKT üzrə savadlılığının artırılmasına yönəldilmiş kompleks tədbirlərin həyata keçirilməsi üzrə təlimlərdə ilin sonunadək 12890 müəllim və 1000 nəfər inzibati idarəetmə heyəti iştirak edəcək.

"Elektron məktəb" layihəsi üçün seçilmiş pilot məktəblərin pedaqoji heyətinin təhsil portalından istifadə üzrə savadlılığının artırılmasına yönəldilmiş təlimlərdə 250 müəllimin iştirakı nəzərdə tutulub. 150 müəllim "1 şagird - 1 kompüter" layihəsi,  531 müəllim "Həmkara dəstək" layihəsi, 200 müəllim isə "Fənlər üzrə elektron təhsil resurslarının hazırlanması" layihəsi üzrə təlimlərə cəlb olunacaq.

Bundan əlavə, orta ümumtəhsil məktəblərinin seçilmiş heyəti üçün Məlumat Toplama Mərkəzindən istifadə üzrə treninqlərə 2000 nəfərin cəlb edilməsi 2012-ci ildə planlaşdırılmışdır. 

Y.ƏLİYEV