Oktyabrın 6-da ADU-nun rektoru, professor Səməd Seyidov  Koreya Respublikasının Hankuk Xarici Dillər Universitetinin prezidenti Park Çul ilə görüşdü. Səməd Seyidov iki ölkə arasındakı münasibətlərin tarixi köklərə malik olduğunu bildirdi. O, Koreyanın ölkəmizdəki səfirliyi ilə qarşılıqlı əməkdaşlıq edildiyini və birgə tədbirlərin həyata keçirildiyini vurğuladı. Koreya ilə əlaqələrə xüsusi əhəmiyyət verildiyini deyən S.Seyidov  ADU-da 40-dək tələbənin Koreya dili ixtisasında təhsil aldığını qonağın nəzərinə çatdırdı. Rektor rəhbərlik etdiyi ali təhsil ocağında 14 əcnəbi dilin, o cümlədən yəhudi, ərəb, yapon, Çin, malay dillərinin də tədris olunduğunu qeyd etdi. Koreya universitetləri ilə ADU-nun əlaqələrinə toxunan Səməd Seyidov Hankuk Universiteti ilə əməkdaşlıqda maraqlı olduqlarını dedi. Rektor  bu baxımdan   imzalanacaq  müqavilənin  universitetlərarası əməkdaşlığın daha da genişləndirilməsinə töhfə verəcəyinə əminliyini ifadə etdi.

Sonra universitetlər arasında əməkdaşlıq müqaviləsi imzalandı.

İmzalanma mərasimindən sonra çıxış edən rektorlar - Səməd Seyidov və Park Çul müqavilənin işlək olacağına, yaxın vaxtlarda səmərə verəcəyinə inandıqlarını qeyd etdilər.

Məlum oldu ki, bu tədris ilində Koreya Respublikasından iki tələbə də Azərbaycan Dillər Universitetində təhsil alır. 

Şakir CƏFƏROV