"Eşidəndə
ki, Bolqarıstanda gənc musiqiçilərin "Ümid.
İstedadlar. Ustadlar" adlı XVII beynəlxalq müsabiqəsində
mən də iştirak edəcəyəm, çox sevindim. Sevindim ki, 23
ölkədən 150 nəfərin iştirak edəcəyi müsabiqədə
Azərbaycanı mən təmsil edəcəyəm...Və həmin mötəbər
yarışmada professorlar Viktor Çuçkov
(Bolqarıstan),Tomislav Baynov (Almaniya) və Tamara
Poddubnayadan (ABŞ) ibarət münsiflər heyətinin yekdil
qərarı ilə kiçik və orta qruplarda "Qran-pri"
nominasiyasında birinci mükafata layiq görüldüm.
Beynəlxalq müsabiqədə yüksək mükafata layiq görülməyimlə
yanaşı, Almaniyada müasir dövrün görkəmli
musiqiçilərinin ustad dərslərində iştirak etmək imkanı
da qazandım", - deyə müsahibim Murad Abbasov son
illərdə ölkəmizdə istedadlı uşaqlara göstərilən diqqət
və qayğını yüksək dəyərləndirdi. Fərəhlə bildirdi ki,
ölkə Prezidenti İlham Əliyev cənablarının müvafiq
sərəncamına əsasən adı Azərbaycanın gənc istedadlarının
"Qızıl kitabı"na yazılmaqla, Azərbaycan Respublikası
Prezidentinin xüsusi aylıq təqaüdünə layiq görülüb.
Qeyd edək ki, Murad Abbasov 1998-ci ildə Bakıda anadan
olub. 2004-cü ildə Üzeyir Hacıbəyli adına Bakı Musiqi
Akademiyası orta ixtisas musiqi məktəb-studiyasının
fortepiano ixtisası üzrə Ayişə Əliyevanın sinfinə daxil
olub. 2006-cı ildə "Məktəb-studiya-25" Uşaq musiqi
festivalının laureatı (II yer), 2007-ci ildə Qara
Qarayev adına gənc pianoçuların IV Bakı musiqi
müsabiqəsinin laureatı (II), 2008-ci ildə Qara
Qarayevin anadan olmasının 90 illiyinə həsr olunmuş
"Gənc musiqiçilər təhlil və ifa edir" I Respublika
elmi-ifaçılıq müsabiqəsinin qalibi, 2010-cu ildə Qara
Qarayev adına gənc pianoçuların I beynəlxalq
elmi-ifaçılıq müsabiqəsinin laureatı adına və I yerə,
eyni zamanda P.İ.Çaykovski adına Moskva Dövlət
Konservatoriyasının medalına və YUNESKO tərəfindən
xüsusi diploma layiq görülüb.
Murad Abbasov Bakıdakı 244 nömrəli tam orta məktəbin
və Üzeyir Hacıbəyli adına Bakı Musiqi Akademiyasının
orta ixtisas musiqi məktəb-studiyasının IX sinif
şagirdidir. Təhsil aldığı ilk günlərdən bilik və
bacarığı, istedadı ilə yaşıdlarından fərqlənən Murad
gələcəkdə Azərbaycan musiqi məktəbinin parlaq
davamçılarından biri olacağına söz verib. O, bizimlə
söhbət zamanı istedadlı gənc yeniyetmələr adından
Azərbaycan Respublikasının Prezidenti İlham Əliyevə və
onun xanımı, Heydər Əliyev Fondunun prezidenti, Milli
Məclisin deputatı Mehriban Əliyevaya təşəkkürünü
ünvanladı.
Sifai SƏFƏROVA |