2005-ci ildə hazırlanmış və təsdiq edilmiş "Ümumi təhsil
sistemində dərslik siyasəti" sənədində göstərilmişdir
ki, "Dərslik... şagirdlərə müstəqil tədqiqatçılıq və
yaradıcılıq vərdişləri aşılamalı, onları düşünməyə sövq
etməli, məntiqi təfəkkürü inkişaf etdirməlidir".
Bəli, həqiqətən də dərsliklər təhsil sisteminin başlıca
amillərindən ən əsasıdır. Dərslik nəinki şagirdlərin
təhsili prosesində istiqamətverici amildir, o,
müəllimlərin də fəaliyyətinin planlaşdırılmasında ən
əsas pedaqoji və metodik vəsaitdir.
Çalışdığım müddət ərzində bir neçə dərslik nümunələri
ilə işləməli olmuşam. Deməliyəm ki, bu dərsliklər
içərisində zövqümüzcə olanı da olub, nisbətən zəifi də.
Lakin bu tədris ilinə nəşr edilmiş və birinci sinif
şagirdlərinin istifadəsinə verilmiş "Azərbaycan dili" və
"Riyaziyyat" dərslikləri haqqında fikirlərim daha
yüksəkdir.
Rəngarəng və gözəl şəkillər mətnləri yaxşı tamamlayır.
Hər bir hərfi keçərkən ona uyğun sözlərin hecalarla
verilməsi şagirdlərin oxu texnikasının
sürətləndirilməsinə kömək edir.
Sözlərdə buraxılmış hecaların nöqtələrlə verilməsi və
şagirdlərin bu hecaları düzgün seçib öz yerinə
yerləşdirməsi təqdirəlayiqdir. Belə çalışmaların
şagirdlərin nəzərinə çatdırılması həm şagird, həm də
müəllimlər üçün maraqlı dərs prosesinin keçirilməsinə
kömək edir.
Yazı nümunələrinin yerləşdirilməsi şagirdlərin çap
hərflərinin yazı nümunəsinə çevrilməsi qabiliyyətinin
sürətləndirilməsinə kömək edir.
Səhifə 96-dakı "Tap görüm" şeiri şagirdlərin
oxuduqlarını dərk edərək xarici aləmlə
uyğunlaşdırılmasına kömək edir. Şəkillər isə bu
tapmacanın açmasının tapılmasını daha maraqlı edir.
Səhifə 103-dəki isimlərin böyük hərflə verilməsini tələb
edən çalışma şagirdlərin ilk addımlardan dil qaydaları
üzrə biliklərə yiyələnməsinə istiqamət verir.
Bu cür çalışmaların növbəti siniflər üzrə dərsliklərdə
də çox yerləşdiriləcəyinə ümid edir və arzulayırıq.
Məncə, şagirdlərin bu cür çalışmaları müəllimdən
eşitməkdənsə, dərslikdə görüb şəxsən oxuması daha
məqsədəuyğundur. "Riyaziyyat" dərsliyi də bir çox
dəyişiklikləri ilə nəzərə çarpır. Dərslikdə yenə təbii
çalarlı rəsmlər göz oxşayır.
Dərsliyin ədədi ifadələrlə zənginliyi, məsələlərin
çoxluğu gələcək dərsliklərin də bu xüsusda nəşr
ediləcəyinə ümid doğurur.
Məncə "Riyaziyyat" dərsliklərinin ədədi ifadələrlə,
məsələlərlə, tənliklərlə, həndəsi çalışmalarla zəngin
olması çox zəruridir.
Gələcəyin məntiqli intellektual şagirdlərini yetişdirmək
üçün bu cür dərsliklərə çox ehtiyac duyulur və həmin
dərsliklərlə şagirdlərimiz dövlətimizin güclü təhsil
siyasəti nəticəsində pulsuz təmin olunurlar. Bunun üçün
də valideyn, şagird və müəllim kollektivi adından çox
sevinir və təşəkkür edirik.
Esmira TAĞIYEVA,
Sumqayıt şəhər N. Tusi adına 12 nömrəli tam orta
məktəbin
ibtidai sinif müəllimi |