Deyirlər ki, işə başlamaq onun yarısını görmək deməkdir.
Ötən dərs ilində direktor kimi fəaliyyətə başlayanda
məktəb təsərrüfatı demək olar ki, bərbad və dağınıq
vəziyyətdə idi. Davamiyyət və nizam-intizam olduqca
aşağı səviyyəyə düşmüşdü. Əvvəlcə valideyn-müəllim
assosiasiyasının fəaliyyətini bərpa etdik.
Məktəbdəki bütün sinif otaqları təmir olunaraq yararlı
hala salındı. Rayon icra hakimiyyətinin və təhsil
şöbəsinin köməyi ilə yeni plastik partalar, yazı
lövhələri, müxtəlif tədris ləvazimatları alındı.
Dərs ilinin ilk günlərindən müəllim və şagirdlərin
intizam məsuliyyətini artırmaq qayğısına qaldıq. Elə
bunun sayəsində şagirdlərin dərsə davamiyyəti
yaxşılaşdı, müəllim-şagird münasibətlərinin düzgün
qurulmasına, təlim prosesinin keyfiyyətinin
yaxşılaşmasına, dərslərin fəal təlim metodları əsasında
keçirilməsinə çalışdıq. Birinci yarımilın sonunda bütün
fənlər üzrə testlər keçirildi. Məktəbin ictimai
həyatında və mədəni-kütləvi tədbirlərdə fərqlənən
şagirdlər mükafatlandırıldı.
Tədricən ən müasir tədris üsullarının sinif otaqlarına
gətirilməsinə nail olduq. Buraxılış imtahanlarında
şagirdlərin əldə etdiyi uğurlu nəticələr çəkilən
zəhmətin hədər getmədiyini göstərdi. Məzunlardan Türkan
Babaşlı qəbul imtahanında 510 bal toplayaraq Bakı
Slavyan Universitetinə, Yusif Səfərov 362 balla
Azərbaycan Memarlıq və İnşaat Universitetinə qəbul
olundu.
Yeni dərs ilində məktəbimizdə təhsil alan şagirdlərin
hamısı dərsliklərlə təmin olunmuşdur. Artıq bir sıra
fənlərdən dərslər İKT-nin tətbiqi ilə keçilir. Tədrisin
keyfiyyətinin yaxşılaşması, yaradılan şərait məktəbdə
şagirdlərin sayının artmasına səbəb olmuşdur. Əvvəlki
illərdə birinci sinfə cəmi 10-12 şagird gəlirdisə, yeni
tədris ilində 26 şagird məktəbə qədəm qoyub. Ayda bir
dəfə hər sinfin və məktəbin divar qəzeti buraxılır.
Şagirdlərin mədəni-kütləvi tədbirlərdə fəal iştirak
etməsini də diqqət mərkəzində saxlayırıq. Təhsil
ocağında oxuyan 146 şagirdin təlim-tərbiyəsi ilə məşğul
olan 32 müəllimin hər birində işə məsuliyyətli münasibət
formalaşıb. Sinif otaqlarında keçilən dərslər kamera
vasitəsilə izlənilir. Təhsillə yanaşı, şagirdlərin
tanınmış alim, pedaqoq və yazıçılar, dərslik
müəllifləri, eləcə də şərəfli döyüş yolu keçmiş Qarabağ
müharibəsi veteranları ilə görüşlərini keçirərək onların
həm də layiqli vətəndaş kimi böyüməsinə çalışırıq.
Günel KAZIMOVA,
Füzuli rayon 50 nömrəli tam orta məktəbin
direktoru |