Oktyabrın 15-də Milli Olimpiya Komitəsinin, İdman və Gənclər, Təhsil nazirliklərinin təşkilatçılığı, BMT-nin Uşaq Fondunun (UNİSEF) maliyyə dəstəyi ilə İsmayıllı rayonunun Olimpiya İdman Kompleksində Azərbaycan Respublikasının Prezidenti cənab İlham Əliyevin sərəncamı ilə ölkəmizdə 2012-ci ilin "İdman ili" elan olunması və Milli Olimpiya Komitəsinin 20 illik yubileyi münasibəti ilə "Təhsil  və təbliğat naminə idman" devizi altında tədbirlər keçirilib. İsmayıllı Rayon Gənclər və İdman İdarəsindən aldığımız məlumatda bildirilir ki, tədbiri keçirməkdə əsas məqsəd ümumtəhsil məktəblərində fiziki tərbiyə fənninin tədrisini təkmilləşdirməklə yanaşı, bu fənnə marağı artırma, uşaqların idman və bədən tərbiyəsi ilə kütləvi şəkildə məşğul olmalarını təmin etməkdən ibarət olub.

Əsl idman bayramına çevrilən tədbir Azərbaycanın Dövlət himninin səsləndirilməsi ilə başlayıb. Açılış mərasimində Milli Olimpiya Komitəsinin vitse-prezidenti Çingiz Hüseynzadə,  UNİSEF-in Azərbaycan nümayəndəliyinin rəhbəri Mark Herevard  və İsmayıllı Rayon İcra Hakimiyyəti başçısının  birinci müavini Rəfael Əhmədov iştirak ediblər. Yarışa  rayonun 5 təhsil ocağından 1 və 5 nömrəli şəhər, İvanovka, Hacıhətəmli və Qalacıq kənd tam orta məktəblərindən ümumilikdə 10 müəllim və 50 şagird qatılıb. Rayonun İvanovka kənd tam orta məktəbi I (birinci) yerə layiq görülüb. Qalib komandalara Milli Olimpiya Komitəsinin diplomu və qiymətli hədiyyələri təqdim edilib.