NDU-da
Azərbaycan hökuməti və Beynəlxalq İnkişaf
Assosiasiyasının birgə həyata keçirdiyi "Dövlət
İnvestisiyaları üzrə Kadr Potensialının Gücləndirilməsi"
layihəsi çərçivəsində "Torpaqların dövlət ehtiyacları
üçün alınması və köçürülmə prosedurlarının izahı"
mövzusunda təlim kursuna start verilmişdir.
Universitetin rektoru, akademik İsa Həbibbəyli təlim
kursunun rəsmi açılış mərasimində çıxış edərək ölkəmizdə
insan amilinə, kadr potensialınıın formalaşmasına və
inkişafına göstərilən diqqət və qayğıdan danışmışdır.
Rektor muxtar respublikada da belə təlim kurslarının
keçirilməsinin müxtəlif dövlət strukturlarında çalışan
dövlət məmurlarının modern idarəetmə sahəsində
təkmilləşdirilməsi, ən son idarəetmə tətbiqi baxımından
əhəmiyyətindən bəhs etmişdir.
E.S.CONSULTİNG MMC-nin direktoru Rauf Əhmədov layihənin
mahiyyəti və kontingenti barədə məlumat vermişdir. Qeyd
olunmuşdur ki, "Dövlət İnvestisiyaları üzrə Kadr
Potensialının Gücləndirilməsi" layihəsi Azərbaycan
hökuməti və Beynəlxalq İnkişaf Assosiasiyası arasında
imzalanmış Maliyyələşdirmə Sazişinə əsasən Dünya
Bankının maliyyə dəstəyi ilə həyata keçirilir.
2009-2013-cü illər üçün nəzərdə tutulmuş layihənin
İcraçı Agentliyi kimi Azərbaycan Respublikası Təhsil
Nazirliyi təyin edilmişdir. Layihə çərçivəsində
Azərbaycan Respublikasının Prezidenti yanında Dövlət
İdarəçilik Akademiyasında "Layihələrin idarəolunması"
ixtisası üzrə yeni magistr proqramının təqdimatı
keçirilmiş, GRBS Beynəlxalq Tədris Mərkəzi və Azərbaycan
Respublikası Təhsil Nazirliyi tərəfindən "Beynəlxalq
Maliyyə Qurumlarının standartları əsasında Maliyyə
İdarəetməsi" təlim kursu təşkil olunmuşdur. Layihə
çərçivəsində reallaşdırılan "Torpaqların dövlət
ehtiyacları üçün alınması və köçürülmə prosedurlarının
izahı" mövzusunda təlim kursunda torpaqların alınması,
köçürülməsi və sosial təhlükəsizlik qaydaları və
prosedurları üzrə praktik bilik və bacarıqlar
aşılanacaq. NDU-da təşkil olunan təlim kursuna Naxçıvan
MR Dövlət Torpaq və Xəritəçəkmə Komitəsi, Naxçıvan MR
Daşınmaz Əmlakın Dövlət Reyestri Xidməti, Naxçıvan MR
Nəqliyyat Nazirliyi və digər dövlət strukturlarında
çalışan mütəxəssislər cəlb olunmuşlar. 5 günlük təlim
kursunun əsas məqsədi beynəlxalq maliyyə qurumlarının
standartları əsasında layihələrin idarə olunması
sahəsində bilikləri artırmaq, mütəxəssislərin maliyyə
idarəetmə bacarıqlarını inkişaf etdirmək, müvafiq sahə
üzrə kadr potensialını gücləndirmək və təşkilatların iş
prinsiplərinin təkmilləşdirilməsinə təkan verməkdir.
Mehriban SULTAN,
NDU-nun Mətbuat şöbəsinin müdiri |