Bakıdakı Bağça-Məktəb-Lisey Kompleksində Dövlət bayrağı və 12 noyabr - Konstitusiya Günü münasibəti ilə keçirilən tədbir Dövlət himninin səslənməsi və üçrəngli Dövlət bayrağının "Koroğlu" operasından uvertüranın sədaları altında təntənəli şəkildə  səhnəyə gətirilməsilə başladı.

Təhsil ocağının direktoru Qafar Hüseynov qonaqları, müəllimləri və şagirdləri bu iki bayram münasibətilə təbrik etdi. O, Dövlət bayrağı və Konstitusiya günlərinin  yaranma tarixləri haqqında tədbir iştirakçılarına geniş məlumat verdi.  Qeyd edildi ki, Dövlət bayrağımız möhtəşəmliyi və ucalığı  ilə Ginnesin rekordlar kitabına düşüb. Hər bir azərbaycanlının borcudur ki, ümummilli liderimizin azərbaycançılıq - vətənpərvərlik ideyalarına sadiq qalsın, bayrağımızın şərəfini hər yerdə qorusun, dünya arenalarında onun ən yüksək zirvələrdə dalğalanmasına nail olsun.

Tədbirdə çıxış edən qonaqlar hər iki bayram münasibətilə xalqımızı təbrik edərək, doğma Azərbaycanımıza əbədi müstəqillik və işıqlı gələcək arzuladılar. Qeyd etdilər ki, gələcəyimiz sayılan məktəblilər tariximiz, milli dəyərlərimiz, adət-ənənələrimiz  haqqında həmişə məlumatlı olmalıdırlar.

Şagirdlər "Heydər babamız" mahnısını həvəslə qonaqlara təqdim etdilər, tədbir onların ifasında bayraq və Konstitusiyaya aid şeirlərlə, mahnılarla başa çatdı.  

Rəşad ZİYADOV