Bu günlərdə İsrailin ölkəmizdəki səfiri Rafael Harpaz Azərbaycan Dillər Universitetinin rektoru, Milli Məclisin deputatı, professor Səməd Seyidovla görüşmüşdür.

S.Seyidov qonağa rəhbərlik etdiyi ali təhsil müəssisəsinin fəaliyyəti, beynəlxalq əlaqələri, qazandığı uğurlar barəsində məlumat vermişdir.

ADU-da bir sıra dil mərkəzlərinin yaradıldığını bildirən rektor universitetdə İsrail və Yaxın Şərq Araşdırmalar Mərkəzinin də fəaliyyət göstərdiyini, onun İsrail və Azərbaycan arasında əlaqələrin inkişafında, yüksəkixtisaslı kadrların hazırlanmasında böyük rolunu qeyd etmişdir. O, universitetdə ivrit dilinin öyrənilməsinin, tədrisinin xüsusi əhəmiyyət daşıdığını bildirmişdir. Rektor ADU-da ivrit dili ilə yanaşı, Yaxın Şərq ölkələrinin də dillərinin, siyasi durumunun, coğrafiyasının, tarixinin tədris olunduğunu vurğulamışdır.

İsrail Prezidenti Şimon Peres və xarici işlər naziri Avigdor Libermanın ADU-ya səfərlərini xatırladan S.Seyidov bunun universitetin həyatında əlamətdar hadisə olduğunu bildirmişdir. Rektor universitetdə təhsil sahəsində münasibətlərə xüsusi əhəmiyyət verildiyini, İsrail səfirliyinin ADU ilə sıx əməkdaşlıq etdiyini vurğulamışdır.

R.Harpaz ADU ilə tanışlıqdan məmnunluğunu bildirmiş, səmimi görüşə görə təşəkkür etmişdir. Diplomat səfirliklə universitetin əməkdaşlığını yüksək qiymətləndirmiş, tələbələr üçün təhsil proqramları çərçivəsində əlaqələrin inkişafından danışmışdır.

Görüşdə, həmçinin tələbə-müəllim mübadiləsi, əməkdaşlığın perspektivləri ilə bağlı fikir mübadiləsi aparılmışdır.

 Sonra səfir universitetdəki İsrail mərkəzində olmuşdur. 

Şakir CƏFƏROV