Azərbaycan Dövlət Pedaqoji Universiteti Tələbə Gənclər Təşkilatı (ADPU TGT) Azərbaycan Tələbə Gənclər Təşkilatları İttifaqının (ATGTİ) dəstəyi ilə Qafqaz Universitetində reallaşdırdığı 3-cü "Gənc liderlər həftəsi" layihəsini yekunlaşdırmışdır.

ATGTİ-nin mətbuat xidmətindən AzərTAc-a bildirmişlər ki, Azərbaycan Dövlət Pedaqoji Universitetinin I kurs tələbələri üçün həyata keçirilən layihədə 254-dən çox müraciət ərizəsi qəbul edilmiş, onlardan 25 tələbə layihənin iştirakçısı olmaq hüququ qazanmışdır.

Layihə çərçivəsində Qafqaz Universitetinin daimi inkişaf mərkəzinin mütəxəssisləri tərəfindən gənclərə "Liderlik", "Layihələrin yazılması və idarə olunması", "Planlaşdırma və iş bölgüsü" və s. mövzularda təlimlər keçilmişdir.

Layihə iştirakçılarına, həmçinin ADPU TGT-nin təqdimatı da keçirilmişdir. Tələbələr layihə ərzində Qafqaz Universitetinin bir çox laboratoriya və araşdırma mərkəzi ilə tanış olmuşlar.

Sonda layihə iştirakçılarına sertifikatlar təqdim edilmişdir.

Qeyd edək ki, layihə çərçivəsində təlimlərdə fərqlənən tələbələr ictimai-fəal gənclər kimi ADPU TGT-nin fəaliyyətinə cəlb olunacaqlar.